Samediggi. Govven: Sara Márja Magga/Sámediggi

Áigemearri cealkámušaide lea dievvagoahtán

Sámediggi lea ožžon bargun buktit cealkámuša Stuorradiggái duohtavuođakommišuvnna mandáhta birra.

Danne leat ge lágidan rabas čoahkkimiid máŋgga sajis Sámis. Maŋŋebárgga ja gaskavahkku lágiduvvojit guokte maŋemuš rabas čoahkkima ja danne lea ge maid áigemearri sáddet cealkámušaid midjiide duorastaga cuoŋománu 26. beaivvi.

– Jus lea oktage gii ii leat vel ollen addit dahje sáddet midjiide cealkámuša, de ferte dan dahkat dál. Mii leat loahpageahčen čoahkkinplánas ja dat mearkkaša ahte mii hábmegoahtit hui fargga Sámedikki cealkámuša mii galgá meannuduvvot dievasčoahkkimis, muitala sámediggeráđđi Henrik Olsen preassadieđáhusas.

Ášši joatkašuvvá gova vuolde.


Sámediggeráđđi Henrik Olsen. Preassagovva: Kenneth Hætta

ATNET ÁRVVUS

Sámediggi lea lágidan 16 rabas čoahkkima dássažii ja oallugat leat leamaš čoahkkimiin.

– Mii atnit árvvus go Sámi álbmot duođaid orru berošteamen dán proseassas ja leat dehálaš cealkámušat maid sii leat buktán midjiide. Mii áigut vuđolaččat ráhkkanahttit ášši sihke Sámedikki dievasčoahkkimii ja Stuoradikki meannudeapmái, lohká Olsen.

Guokte maŋemus rabas čoahkkima lágiduvvojit Aajege saemien gïele- & maahtoejarnge, Plassjes, maŋŋebárgga cuoŋománu 24. beaivvi dii. 18:00 ja Tråantes, Best Western Hotell Bakeriet čoahkkinlanjas, gaskavahkku cuoŋománu 25. beaivvi.

Olbmot sáhttet ain sáddet čálalaš cealkámuša mandáhtii reivve bokte Sámediggái, Ávjovárgeaidnu 50, 9730 Kárášjohka dahje e-poastta bokte: duohtavuohta@samediggi.no