Sámediggepresideanta Aili Keskitalo. Govva: SÁMi ođasmagasiidna

30 jagi dassá go ILO-konvenšuvdna mearriduvvui

ILO konvenšuvdna nr. 169 eamiálbmogiid ja čearddalaš álbmogiid birra iešmearrideaddji riikkain (ILO-169) mearriduvvui ILO generálakonferánssas Geneves 30 jagi áigi, geassemánu 27. beaivvi 1989.

– Sámedikki bealis háliidan dán mearkabeaivvi lihku sávvat sápmelaččaide ja eará eamiálbmogiidda, earenoamážit stuorra barggu geažil maid ollu sápmelaččat ja eará eamiálbmogat dahke ráđđádallamiin Geneves, dadjá sámediggepresideanta Aili Keskitalo.

  Norggas lei ráđđádallamiin njunuš rolla ja Norga lei vuosttaš riika mii geassemánu 20. b. 1990 ratifiserii konvenšuvnna stuorradiggemearrádusain, ja dat doaibmagođii čakčamánu 5. b. 1991. Dán rádjái leat 23 miellahttoriikka ratifiseren ILO-169. Dáin riikkain leat eatnasat Láhtin-Amerihkás. Earret Norgga leat Eurohpás Dánmárku, Espánnja, Luxemburga ja Nederlánda ratifiseren konvenšuvnna. 

– Mun áiggun geavahit vejolašvuođa ávžžuhit Ruoŧa, Suoma ja Ruošša álggahit barggu konvenšuvnna ratifiseremiin, dadjá Keskitalo.

Konvenšuvnna váldoprinsihppa lea eamiálbmogiid vuoigatvuohta suodjalit ja ovddidit kultuvrraset, ja eiseválddiid geatnegasvuohta bidjat johtui doaibmabijuid mat dorjot dán barggu. Konvenšuvnna áigumuš lea ovttasbargu stáhta ja eamiálbmoga gaskka. Konsultašuvnnat buori jáhkuin ja áigumušain olahit ovttamielalašvuođa stáhta ja eamiálbmoga gaskka lea okta váldobealli. Konvenšuvdna dohkkeha maid eamiálbmogiid vuoigatvuođaid eatnamiidda, luondduresursade, gillii, ohppui, dearvvasvuhtii, ii-vealáheapmái jna. 

– Dan oktavuođas go markeret ahte lea 30 jagi dassá go konvenšuvdna mearriduvvui, fertet dovddastit ahte Norga ii vel ollašuhte konvenšuvnna, earret eará Sámi vuoigatvuođalávdegotti čielggadeami NAČ 2007:13 čuovvuleamis, Keskitalo loahpaha.