Sámediggeráđđi Mikkel Eskil Mikkelsen. Govva: Åse M.P Pulk/Sámediggi

200.000 ru doarjjan lullisámi mánáidgárdái

Sámediggeráđđi lea juolludan 200.000 ruvnno doarjjan Røros-mánáidgárddi Ysterhagan barnehage/Luvlege managïerte lullisámi ossodahkii Svaalen goevtese lullisámegielat mánáidgárdegelbbolašvuođa rekrutteremii.

Lullisámegielat mánáidgárdeossodat Svaalen goevtese Røros-mánáidgárddis Ysterhagan barnehage/Luvlege managïerte rahppui 2016:s. Mánáidgárddis leat leamaš hástalusat go sámegielat mánáidgárdefálaldat lea organiserejuvvon ossodahkan dáčča mánáidgárddis. Váilot oahppan sámegielat fágaolbmot mánáidgárddis, seammás go lullisámegiella lea hui hearki mánáidgárdeárgabeaivvis gos dárogiella lea váldogiella.

Danne leat álggahan prošeavtta Lullisámegielat mánáidgárdegelbbolašvuođa rekrutteren. Ulbmil lea rekrutteren boahttevaš lullisámegielat fágagelbbolašvuođa, ja ávžžuhit ja movttiidahttit olbmuid váldit mánáidgárdeoahpu ja lullisámegieloahpu.

Sámediggeráđđi juolluda 200.000 ruvnno prošektii doarjjaortnegis Doarjja prošeavttaide ja ovddidanbargguide mánáidgárddiin.

– Prošeakta lea hui buorre dainna ulbmiliin ahte oažžut eanet lullisámegielagiid mánáidgárdái, doppe han biddjo vuođđu oahppat giela, dadjá sámediggeráđđi Mikkel Eskil Mikkelsen preassadieđáhusas.

Prošeakta galgá maid fállat bargiide nannet iežaset lullisámegiel gelbbolašvuođa giellaoahppama bokte.

– Dát lea hui buorre sihke mánáide, váhnemiidda ja mánáidgárddebargiide, muhto maiddái lullisámi servodahkii. Nanu giella- ja kulturgelbbolašvuohta bargiin lokte sámi mánáidgárdefálaldaga dási, ja unnida tendeansa ahte dárogiella šaddá ráđđejeaddji giellan, dadjá Mikkelsen.