Elsa Laula Renbergeste. Guvvie: Tromsø Museum

Voestes statuvem saemien gujneste noelehte goevten 6. b. Vaapstesne

Goevten 6.b. edtja dom voestes statuvem Elsa Laula Renbergeste noelehtidh, mij öörnedæjjaj mietie raaktan dïhte voestes statuve sjædta aktede saemien gujneste Saepmesne. Dïhte stoerre heannadimmie sjugniehtåvva Vaapstesne jïh Saemiedigkien stoerretjåanghkoen åvtehke Tom Sottinen edtja statuvem noelehtidh. Aaj gellie jeatjah mïerhkesjimmieh abpe åarjelsaemien dajvesne saemiej åålmegebiejjien.

Jïjtjehke åssjalommese statuvasse Mildrid Hendbukt-Søbstad, Tordis Landvik, Inger Lise Strøm jïh Dag Hugo Heimstad åadtjoejin såemies jaepiej juassah gosse gaajhkesh lin vïhtesjadteme Vaapste jïh dajvh bïjre jarkan idtjin naan statuvh gujnijste utnieh, jïh dan åvteste dah eajhnadovvin maam akt dejnie darjodh.


Guvvietjoehpije Ellen Jacobsen. 
Guvvie: privaate

Guvvietjoehpije Ellen Jacobsen lea statuvem dorjeme. Ellen Jacobsen gaskem jeatjah skulptuvrem ”Fabrikkjentene, Oskar-Braaten-monumente” Beyerbruesne Oslosne. Ellen Jacobsen lea stïeresne noelehtimmesne. Dïhte tuhtjie joekoen hijven satne barkoem åadtjoeji statuvem darjodh Elsa Laula Renbergeste.Saemiedigkie jïh Nordlaanten fylhkentjïelte leah ekonomeles dåarjoem vadteme statuvasse. Sparebankstiftelsen Helgeland lea dam stööremes dåarjoem vadteme.

Jïjtjehke noelehtimmie sjugniehtåvva Vaapsten raeriegåetien lïhke ts. 1300. Saemiedigkien stoerretjåanghkoen åvtehke Tom Sottinen noelehtimmiem dorje. Noelehtimmien mænngan lea gyrhkesjimmie Dolstaden gærhkosne.Gyrhkesjimmien mænngan rïesegh Elsa Laula Renbergen kroepten nille bïejesuvvieh.Ts.18.00 öörnedimmie sjædta Vaapsten museumisnie aktene preessebïevnesisnie öörnedæjjeste tjåådtje.

Goevten 6. b. Rørosesne


Jenny Fjellheim. Guvvie: rorosmuseet.no

Jenny Fjellheim Rørosen museumisnie SÁMI Ođasmagasiidnese soptseste dah sijhtieh aktem gellielaaketje programmem utnedh daan jaepien.

– Mijjieh pryövebe faalenassem utnedh dovne maanide jïh geerve almetjidie jïh stööremes bielie sæjhta museumisnie årrodh. Mijjieh vuesiehtimmiem rïhpestibie man nomme ”Meatan laante gaarvene”, mij dorjesovvi Tråante-2017-heevehtæmman. Håkon Hermanstrand Nord universiteeteste sæjhta vuasahtallemen bïjre soptsestidh.

Lissine aelhkie gåassoehtimmie sjædta Røros-museumisnie jïh mijjieh bearkoejoptsem doekebe. Tsåahka 17.00 jïh 19.00 darjomh maanide jïh geerve almetjidie gusnie programmen mietie Gadtsegarhkh båetieh, jïh svaale Tjabph guessine båata. Desnie soptsestimmieboelhke, laavlome, vuelie jïh hævvi såemies faarhkoeh sjædta. Tsåahka 19.00 nöörjen gyrhkesjimmie sjædta hearrine Harald Haugen.

Aaj vuasahtalleme jïh jïjnje vielie Snåasesne

Birgitta Fossum, museumen direktööre Saemien Sijtesne maahta aaj soptsestidh dej leah gellie darjomh goevten 6. b. Biejjie aalka saemiej laavloeminie jïh gaavnesjimmine saevegen lïhke Åarjel-saemiej internaaten ålkolen, dan mænngan håalome jïh laavlome Snåasen skuvlesne. Tsåahka 11.00 byögkeles rïhpestimmie vuasahtallemistie ”Båatsoe tjååhpehkisnie jïh vyölkehkisnie” mij lea guvvieh dagke dehtie voestes saemien fotograafeste Nils Thomasson.

Tsåahka 12.00 maahta filmestuhtjetjh åarjelsaemien dajveste vuejnedh jïh tsåahka 13.00 edtja orre åarjelsaemien maanagærjah åehpiedehtedh Snåasen gærjagåetesne. Kafé Midtpunktet maahta namhtah prïhtjegem jïh gaahkoeh åadtjodh tsåahka 14.00 raejeste, jïh tsåahka 16.00 raejeste doekeme saemienlaaketje beapmoste. Akten tæjmoen mænngan dïhte byögkeles rïhpestimmie aalka kultuvrelle boelhkine, daan beajjetje håaleminie gusnie gaskem jeatjah learohkh saemienskuvleste jïh tjïelten åejvie Tone Våg håaloeh. Dïhte ellen stööremes heannadimmie lea åehpiedehteme prosjekteste ”Daan våhkoen baakoe” mij lea 52 saemien baakoej jïh dej gaektsie jaepieboelhki almetji bïjre. Biejjie orreje gyrhkesjimmine Snåasen gærhkosne tsåahka 19.00.

Raarvihke smaave jïh stoerre almetjidie

Berit Ellen Gaino Jåma, Raarvihkesne soptseste dah gaskem jeatjah dejtie båarasåbpoe almetjidie bööredamme båetedh gaskebiejjiem byöpmedidh healsoejarngesne, jïh maanah åadtjoeh guessine mïnnedh giedtesne.