Saemien vætnoem vihteste fotoguvviej tjïrrh

Saemien vætnoe akte vihkeles kultuvreguedtije jeenjesidie. Såemies lea vætnojne gïehtelamme abpe jieledem, mubpieh aadtjen aalkeme. Daelie såemies dejstie lea vihtiestamme fotoguvviej tjïrrh.

Jarkoestimmie: Ellen Bull Jonassen

Naina Helén W. Jåma (27) lij daan gïjren sov mubpine jaepine galhkeme sov ööhpehtimmeste fotojournalistihkesne, Nordens fotoskuvlesne. Ööhpehtimmie maam Jåma vaalta golme jaepieh vaasa jïh skuvle lea sijjesne Bålsta, ij dan guhkede Stuehkeste.


Guvvie: Naina Helén W. Jåma

Goh eksamenelaavenjasse veelji guvvieh vytnesjæjjijste vaeltedh, mij illedahkine sjïdti gaskem jeatjah akte ektievuasahtalleme klaassine ektine dennie åehpies gallerijesne Galleri Kontrast Stuehkesne.

Daelie Jåma sov prosjektem vuesehte Saemien Sijtesne, Snåasesne.

Fotografije akte vihkeles åehpiedehtemevuekie


Guvvie: Naina Helén W. Jåma

Dïhte noere fotograafe lea jïjnjem ussjedamme giejstie satne sïjhti guvvieh vaeltedh, gie soptsestæjjagïele soptsesisnie maam sæjhta soptsestidh. Dïhte veanhta akte væjkele fotograafe maahta vuartasjæjjese aktem nuepiem vedtedh guvviem toelhkestidh guktie dïhte aktem goerkesem jïh domtesem vadta dehtie almetjistie jallh dehtie aateste mestie satne guvvieh vaalta, jïh sutnjien lea vihkeles dejtie saemien soptsesidie soptsestidh.


Guvvie: Naina Helén W. Jåma

Juktie manne leam åehpiedehtieminie naa guhkiem gïehtelamme jïh ij ajve fotoguvviej tjïrrh, dle sïjhtim dam saemien kultuvrem eevtjedh, jïh vuesiehtidh man vihkeles dïhte lea. Dan åvteste manne leam vætnojne jïjtje gïehtelamme, dellie damtim daate lij akte teema misse ïedtjem utnim, jïh man bïjre daajroem utnim gellene njieptjesne, jïh dan åvteste meehtim guvvieh vaeltedh  dejstie mah vætnojne gïehtelieh, Jåma soptseste.

Maahta stoerre prosjektine sjïdtedh

Naina Helén göökte askh utni mejtie meehti prosjektesne nuhtjedh, jïh sïjhti aalkoelisnie gaajhkesidie åarjelsaemien dajvesne gaavnesjidh. Jïh jïjtse vuajnoen mietie daate lij ånnetji fer stoerre prosjekte. Prosjekteboelhken ryöhki guvvieh vaeltedh 15 almetjijstie. Daan giesien såemies orre guvvieh vaalteme jïh dïhte naa seekere satne sæjhta prosjektine jåerhkedh guhkiem.

Dïhte lea prosjekten tjïrrh almetjh gaavnedamme mejtie gutnie dan åvteste dah leah vihkeles aerpievuekien guedtiejinie saemien kultuvreste. Jåma sïjhti vuesiehtidh jienebh dimensjovnh saemien kultuvresne gååvnesieh, sïjhti vuesiehtidh doh aerpievuekieh, altese mïelen mietie, eah leah naan vuastalimmie daaletje tïjjese.


Guvvie: Naina Helén W. Jåma

–Manne sån sïjhtem mov prosjektine jåerhkedh jïh gegkestem daate minngemosth gærjine sjædta. Daelie jienebh almetjh vijreminie mejstie maahtam guvvieh vaeltedh jïh mejtie maahtam gihtjehtidh, guktie jis naakenh naan tips munnjien utnieh, tjuerieh ajve gaskesadtedh. Aalkoelisnie lim ussjedamme åarjelsaemien dajvesne barkedh men daelie sïjhtem almetjh abpe Saepmesne gaavnedh giejstie maahtam guvvieh vaeltedh, Jåma soptseste mij veelji ööhpehtimmiem vaeltedh goh fotograafe dan åvteste veanhta guvvieh akte veaksehke meedija jïh guvviejgujmie maahta gellie almetjh jaksedh.

Mïetsken 31. b. raajan maahta Naina Helén W.  Jåman (27) guvvieh vuejnedh Saemien Sijtesne Snåasesne.