Dellie maa akte vihth saemien filmefestivaale

Daej biejjiej aalkeme orre filmefestivaalem Rørosesne soejkesjidh. Festivaale eajhnadåvva saemien filmefestivaaline sjïdtedh, jïh datne maahtah meatan årrodh nommem dïsse vedtedh.

Tråante 2017-heevehtimmesne kinove Rørosesne, kinoven åvtehken baaktoe, Jo Hage, sïjhti heevehtimmiem mïerhkesjidh jïh saemien filmh vuesiehtidh. Goh jeahteme goh dorjeme jïh aktene fuehpies filmebiejjesne dah 12-13 saemien filmh vuesiehtin Storstuggusne Rørosesne. Abpe filmebiejjie akte stoerre lahkoe sjïdti jïh dan åvteste sïjhti dam akten ihkuve heannadæmman darjodh. 

– Gosse vööjnimh daate akte hijven öörnedimmie sjïdti, gosse dan jeenjesh böötin mah sïjhtin filmem vuartasjidh, jïh ij lij ajve saemieh mah böötin, dellie gaavnehtimh mijjieh sïjhtimh daate edtji saemien filmefestivaaline sjïdtedh. Jïh gosse vuesiehtimmien gaavhtan vuajna Tromsø International Film Festivalesne ahkedh jienebh filmh båetieh, dej gaskem Amanda Kernell jïh altese lahkoe filmine Saemien vïrre, dellie dïhte vuesehte saemien filmh hov gåarede darjodh. Røros aadtjen saemien reeremetjïeltine sjïdteme, guktie mijjen leah nuekies argumeenth juktie guhkiebasse barkedh dagkeres filmefestivaalem buektiehtidh, kinoven åvtehke Jo Hage jeahta,

Dellie maa akte vihth saemien filmefestivaale

Kinoven åvtehke veanhta sijjie gååvnese akten vihth filmefestivaalese Nöörjesne. Altese daajroen mietie ij leah naan saemien filmefestivaale Nöörjesne daan biejjien, jïh gosse filmefestivaale åarjelsaemien dajvesne öörnesåvva, dïhte lea lissie murreds. Aaj gåhkese Inarisnie mïnnedh gusnie Skábmagovat 

– saemien- jïh aalkoealmetjefilmefestivaale öörnesåvva fïerhten tsïengelen. Dan åvteste satne jïh doh mubpieh moenehtsisnie sijhtieh filmefestivaale edtja saemien profijlem utnedh, jïh guhkiebasse pryövedh olkese veartenasse jaksedh.

Meatan åtna gaskem jeatjah Stig Arne Somby mij saemien filmefestivaalem guhkiem sjaavnjoehtamme.

– Jaepien 2019 EN:n gaskenasjonaale aalkoealmetjegïelejaepie, akte hijven jaepie filmefestivaaline nïerhkedh goh daate. Dan åvteste sïjhtebe vuesiehtidh jeatjah aalkoealmetjefilmh jïh destie dagke jienebh vuartasjæjjah filmide åadtjodh, Somby tjïelkeste.

Dah guaktah ussjedægan festivaale edtja gaajhkesidie årrodh, men sjïerelaakan stuvresovvedh maanaj jïh noeri vööste. Håhkoe lea festivaale maahta våaromem vedtedh orre noere saemien filmesjugniedæjjide. 

– Mijjieh soejkesjeminie skuvlevuesiehtimmieh festivaalen åvtelen, jïjtse maanaprogrammem, åenehksfilmeprogrammem jïh sïejhme filmh, mijjieh vuarjasjibie jienebh sijjieh gusnie maehtebe filmh vuesiehtidh, jïh soejkesjeminie dam voestes filmefestivaalem öörnedidh gålkoen/rahkan 6.-10. b. 2019. Akte dejstie aatijste mejnie daelie barkeminie lea beetnehvierhtieh gaavnedh. Ibie annje daejrieh mennie åesesne festivaale sjædta men lissine filmevuesiehtimmide sïjhtebe aktem jallh jienebh barkoegaavnedimmieh buektiehtidh gusnie maanah jïh noerh maehtieh lïeredh filmem darjodh. Mijjieh tjarke sïjhtebe festivaale edtja meatan årrodh noerh skreejrehtidh filmine barkedh, Hage tjïelkeste.

Guktie festivaalen nomme?

Doh göökte filmeruerrieh gegkiestieh dåarjoem åadtjodh dovne Saemiedigkeste, Saemieraereste, Saemien filmeinstituhteste, Røros tjïelteste jïh jieniebijstie. Men uvtemes tjuerieh nommem gaavnedh festivaalese jïh dïsse viehkiem sijhtieh lohkijijstie plaereste Samimag.no.

– Ibie nommese ussjedamme annje, jïh dan åvteste dijjieh doh voestes mah festivaalen bïjre tjaelieh, gegkiestibie naakenh dijjeste aktem hijven nommem festivaalese utnieh. Seedtede maaje aktem jallh jienebh nommeraeriestimmieh mijjese, akte eadtjohke Stig Arne Somby jeahta mij hævvi sån sæjhta, kinoven åvtehkinie ektine Rørosesne, Jo Hage, såemies tjaangemeleahpah kinovasse vedtedh dïsse mij vitnijinie sjædta.