Eva Nordfjell. Privaate guvvie.

500 tåvsenh kråvnah sïeltese Rørosrein AS dåårje

Saemiedigkieraerie 500 tåvsenh kråvnah sïeltese Rørosrein AS dåårje juktie produksjovnelokaalide stueriedidh jïh gïebrememaasjinam åestedh.

Saemiedigkieraerie Silje Karine Muotka jeahta Rørosrein AS hijven evtiedimmienuepieh åtna båetijen aejkien, jïh sïelte lea jienebh dorjesh bovtsenbearkoste evtiedamme jïh gellie stonkehke åestijh åtna daan biejjien.

Rørosrein AS tseegkesovvi 2010. Sïeltesne göökte åarjelsaemien fuelhkieh mah gåabpatjahkh bovtsigujmie gïehtelieh Røros-dajvesne. Åerpenh Eva Nordfjell jïh Knut Tørresdal leah gåabpegh båatsoeaajhterh Gåebrien Sïjtesne. Rørosrein AS njieljie jaepiebarkoeh åtna, govhte ihkuve barkijh jïh govhte barkijh lissine leekedimmieboelhken. Sïelte bovtsenbearkoem dorje jïh duaka.

Dorjesh duakasuvvieh sïelten tjïrrh Rørosmat, bovresne gaertienisnie, meessine, festivaaline jïh jïjtsh doekemen tjïrrh bovride jïh restaurantide. Sïelte aaj aktem stoerre derhviegåetiem gaertienisnie tseegkeme, gusnie bearkoem jïjtsh produksjovneste, jïjtjetjöönghkeme muerjieh/goebperh jïh guelieh gåassoehtieh jïh åarjelsaemien båatsoen bïjre Røros-dajvesne soptsestieh guesside. Goh akte mierie sïelten bïjre daelvege dah leah såemies vuejemeråantjoeh deememe.

– Dastegh Rørosrein AS edtja buektiehtidh dam hijven evtiedimmiem bæjjese fulkedh dellie vihkeles sïelte sov lokaalh stueriedieh, juktie dïhte sæjhta lissiehtamme produksjovnem jïh jollebe åesiestimmiem vedtedh, jïh dan åvteste saemiedigkieraerie ohtsemem dåårje, jeahta Silje Karine Muotka preessebïevnesisnie. 

Emneord: