32 jaepieh vuertemetïjje maahta bijjelen årrodh

Akten 32 jaepieh vuertemetïjjen mænngan reerenasse lea sïllem åvtese darjoeminie akten orre gåetien bïjre Saemien Sijtese. Saemien Sijten ståvroeåvtehke Dan Jåma ij bigkemasse jaehkieh åvtelen kroehkememaasjina sijjesne tjåådtje.

Göökth jaepien Saemiedigkie  råårestallemetjåanghkoeh tjïrrehte reerenassen departemeentigujmie mah dïedtem utnieh saemien aamhtesi åvteste. Daan jaepien tjåanghkoe tjïelteministerinie åarjelsaemien dajvese bïejesovvi. Evteben våhkoen tjïelteministere Monica Mæland jïh Saemiedigkiepresidente Aili Keskitalo guessine mïnnigan Snåasese jïh Saemien Sijtese.

Mæland nuepiem åadtjoeji buerebelaakan Saemien Sijtine åahpenidh jïh dej soejkesjigujmie akten orre gåetien bïjre.

– Manne meatan vaaltam dejtie vuajnojde mejtie leam daesnie åådtjeme daan biejjien. Manne tjarke guarkam daate gåetie mij daan biejjien åtnasåvva lea fer onne sjïdteme jïh lea aktene hammosne mij ij leah hijven jïh ij leah sjïehtedamme båetijen aajkan. Saemien Sijte akte joekoen vihkeles kultuvreguedtije jïh vihkeles orrestamme lokaalh åadtjodh mej sisnie gåarede barkedh jïh gusnie maahta vaarjelidh dejtie ”skaehtide” mej åvteste seamadamme dïedtem vaeltedh. Manne dovne kultuvreministerem jïh Jeløya-bæjhkoehtimmiem dåarjoem mah sijhtieh daam bigkemem tjirrehtidh dan gåhkese gåarede jïh dan dahkoesijjien sisnjelen maam utnebe, Mæland Sami Ođasmagasiidnese jeahta mænngan vuesiehtamme lea gaervies.

 

Orre gåatan jaahka

Saemiedigkiepresidente Aili Keskitalo lea joekoen positijve ministeren vaaksjomen mænngan. Daelie Keskitalo veanhta åarjelsaemien museume jïh kultuvrejarnge Snåasesne vierhtieh åådtje akten orre gåatan joe mubpien staatebudsjedtesne.

Mijjieh tuhtjimh ministere daarpesji tsiehkiejgujmie Saemien Sijtesne åahpenidh, dovne guktie dah leah daan biejjien, men aaj dej soejkesjigujmie båetijen aajkan. Daesnie hijven nuepieh gååvnesieh dovne aktem sjïere museumebarkoem buektiehtidh, aktem sjïere kultuvrebarkoem jïh ij goh unnemes aktem sjïere fealadassebarkoem buektiehtidh mah leah ektiedamme Saemien Sijtese, saemiedigkiepresidente Aili Keskitalo jeahta.

 

32 jaepieh guhkies vuertemetïjje

32 jaepieh åarjelsaemieh leah akten buerebe gåetien åvteste barkeme. Gåetie lea guhkede gietjeste fer nåake jïh fer onne sjïdteme. Magasijne lea bïejesovveme akten båeries vaeknievåarhkose maam Nato aarebi nuhtji. Vaallah Saemien Sijten eensi tjöövke jallh lïegkedimmietjiehtjele jïh ij akt dorjesovveme vuasahtallemidie.

Daate gåetie lea neebnesovveme Jeløya-bæjhkoehtimmesne, guktie daelie sån tjuara ajve formaliteeth årrodh åvtelen daate gåetie maahta bigkesovvedh. Manne gujht jaahkam mijjieh hijven saernieh åadtjobe daan jaepien staatebudsjedten sjïekenisnie, Keskitalo jeahta.

Ståvroeåvtehke Saemien Sijtesne, Dan Jåma ånnetji vååregelaakan dåajvoehtasse jaahka beetnegi bïjre varke.

– Joekoen vihkeles mijjese gosse tjïelteministere guessine båata dan åvteste dihte jïh kultuvreministere leah doh göökte vihkielommes aktöörh ihke mijjieh edtjebe aktem orre gåetiem åadtjodh. Mijjieh hov 32 jaepieh barkeme aktine vijriedimmine gåeteste, guktie manne hov sïjhtem kroehkememaasjinam gåetiesijjesne vuejnedh åvtelen maam akt jaahkam. Men doestem jiehtedh mijjieh ibie gåessie gænnah dan lïhke ulmiem orreme goh daelie. Guktie mov leah stoerre håhkoeh daelie, Jåma minngemosth jeahta.

 

Göökte seammavyörtegs almetjh

Gosse tjïelteministere gyhtjelassem åådtje maam satne veanhta saemien aalkoealmetjen posisjovnen bïjre daan biejjien, dellie naemhtie vaestede:

Manne iktegisth jeahtam mijjieh libie göökte seammavyörtegs almetjh. Mov dïedte lea dejtie saemien jïh jeatjah unnebelåhkoen ïedtjide iktedidh. Manne vïenhtem dihte akte vihkeles bielie mov barkoste departemeentesne. Mijjieh hijvenlaakan råårestallebe jïh manne gellie tjåanghkoeh åtneme saemiedigkiepresidentine mænngan eelkim, ministere soptseste.