Višuvdna

Višuvdna

iSámi.Press – galgá leat medialávdi mii čohkke ja čalmmusta sámi ođđasiid ja eará servodatáigeguovdilis ságaid. iSámi.Press OS:a áigu beroštahttit olbmuid árgabeaivvis. Áigumuš báidná buot maid bargat ja buot bálvalusaid maid fállat.

    -Čohkkejeaddji ođas- ja dieđáhuslávdi oktasaš Sápmái.

Gávpejurdda lea álggahit sámi digitála ođaskanála iSámi Press. iSámi Press doaimmahuslaš ulbmil lea gohcit ođđasiid miehtá sámi guovllu Norggas, Ruoŧas, Suomas ja Ruoššas, ja gohcit buot áššiid mat gusket sámi diliide oppamáilmmálaš servodagas.

iSámi.Press áigu ráhkadit oktasaš sámi lávddi, oppamáilmmálaš lihtu, mii čalmmusta sámi ođasáššiid sámi oaidninčiegas, ja mii nanne ja ovddida sámi giela ja sámi kultuvrra. Min ealjuhusat geatnegahttet min juohkit dieđuid sámi diliin ja eamiálbmogiid áššiin.

Mii áigut ráhkadit ođas- ja dieđáhusportála (iSámi.Press) gos ođasáššit čohkkejuvvojit ja ráhkaduvvojit miehtásámi oaidninčiegas ja mii guovdilastá digitála máilmmi.

iSámi.Press galgá maiddái fállat riikkavuloš ja riikkaidgaskasaš servviide, ásahusaide ja almmolaš eiseválddiide dieđu sámi servodatdiliin. Mii áigut láhčit dilálašvuođaid rabas ja čuvgejuvvon almmolaš ságastallamii sámi álbmoga bokte, guovdu ja várás. Mii áigut veahkehit dahkat buori servodatovdáneami Sápmái, ja rahpat gulahallama máilmmi eará eamiálbmogiiguin.