Váttes ášši čuožžilan Guovdageainnus

Juohke jagi leat konfirmánttat konfirmerejuvvon gávttehassan eanaš sámi guovlluin. Guovdageainnus goit lea leamaš árbevierrun čiŋadit gávttiin sihke go risttahuvvo ja konfirmerejuvvo. Konfirmašuvdna lea leamaš vuosttaš lávki ollesolbmo máilbmái, ja váhnema árbevierru lea láidestit su girkui ja maiddái skáhppot sámi árbevirolaš čiŋaid.

Dál goitge  soames váhnemat dáhttot vieris vieruid Guovdageainnu konfirmašuvnna ipmilbálvalussii. Konfirmánttat galget coggat káhpaid, vai čiŋaide ii galgga leat fokus. Máŋga váhnema oainnát vuhttet nuoraid gaskkas čikŋadeattu mii sáhttá šaddat oba divrrasin. Danne dáhtoše váhnemat konfirmánttaide káhpa.

Juohke girkus lea searvegodderáđđi, mii mearrida dákkár áššiin. Diibmá mearridii ráđđi ahte konfirmánttat eai leat geatnegahtton káhpaid geavahit. Dál reagere searvegodderáđi lahttu ja lea čállán reivve báhppii dan birra. Maiddái Guovdageainnu searvegodderáđi jođiheaddji ja Sámi girkoráđi jođiheaddji doarjuba gáktegeavaheami konfirmašuvnnas.

Lea duođaid váttes ášši ja mii ipmirdit váhnemiid, geat dovdet čikŋadeattu šaddat váttisin, erenoamážit go mii diehtit ahte čiŋat leat divrasat ja diehtit maid ahte doalutge leat divrasat. Goitge fertet doarjut ja seailluhit iežamet kultuvrra. Jus mii eat cokka šat gávtti girkui ja nu dehálaš doaluide go konfirmašuvdnii, de duodjekultuvra ja duodji jávká veahážiid mielde. Go mánná konfirmerejuvvo, de han son vuosttaš geardde oažžu ollesolbmo čiŋaid. Eanaš dat čiŋat čuvvot su agibeaivvi jus bures vurkkoda daid. Lea maid oba hávski oaidnit go sin gáktečikŋavuođđu lea sajis, ja don dieđát dál leat mánás čiŋat mat bistet. Ná bistá maid min kultuvra.

Mii oaivvildit ahte mii baicce fertet fokuseret goluide ja mánáid árvvuide. Lea váhnemiid ovddasvástádus čilget mánnái ahte ii leat buoremus dat geas divraseamos risku ja divraseamos boagán. Mii diehtit maid ahte leat oba olu gáktegoarrunkurssat ja eará duodjekurssat, maidda sihke nuorat ja váhnemat sáhttet searvat ja nu unnidit goluid. Dieđán ahte ovdamearkka dihte Billávuonas leat máŋga konfirmántta ieža gorron gávtti kurssas dahje skuvllas. Dušše dat addá earálágan árvvuid mánáide. Sáhtašii maiddái skuvlafágan goarrut alcces gávtti konfirmašuvdnii, boahkániid ráhkadit ja liinniid riessut.  Jurddaš man somá dat livččii. Jurddaš movt dat seailluhivččii min árbevieruid ja jurddaš movt de golut njiejaše.

Mun fertet lohkat nugo Sámi girkoráđi jođiheaddji Sara Ellen Anne Eira.  Persovnnalaččat mun oaivvildan ahte ii leat lunddolaš sámi guovlluin geavahit káhpa ja čiehkat sámi biktasiid.  Mii eat galgga ballat čájeheames sámevuođa. Dattege ferten vel dange dadjat, ahte eat mii dárbbaš mearihuddat. Vaikko makkár risku ja boagán leačča, de leat buohkat seamma árvosačča. Jus mii váhnemat dan oahpahit mánáide ja nuoraide, de mii ollet guhkás dušše dáinna.

Emneord: