Sámediggeáirras ja ON eamiálbmotforuma lahttu Anne Nuorgam (55) Ohcejogas eret lea válljejuvvon jođihit ON eamiálbmotforuma 18. čoahkkima. Son lea maid nana evttohas jođihišgoahtit ieš foruma giđa rájes. Govva: Norgga ja Suoma Sámedikkit

Válljejuvvon ON eamiálbmotforuma čoahkkinjođiheaddjin

Anne Nuorgam lea válljejuvvon jođihit ON eamiálbmotáššiid bistevaš foruma čoahkkima, mii dál lágiduvvo New Yorkas. Son lea maiddái evttohuvvon Eamiálbmotáššiid bistevaš foruma jođiheaddjin.

Ohcejohkalaš Anne Nuorgama (55) mii dovdat nana politihkalaš jietnan, geas lea juristaduogáš, ja gii ovddida olu vuoigatvuođa áššiid. Son lea leamaš Sámi ráđi jođiheaddji 2008-2011 ja lea Suoma sámedikki áirras ja Ovttastuvvan našuvnnaid eamiálbmotáššiid bistevaš foruma lahttu. Dál son válljejuvvui jođihit ON eamiálbmotáššiid bistevaš foruma 18. čoahkkima. Čoahkkin lea New Yorkas ja bistá guokte vahku.

Gudnejahtii Ánne luđiin

Beaska Niillas gii ovddasta Sámi ráđi New Yorkas, juoiggastii sámi árbevirolaš málle mielde juoiggastii Anne Nuorgama eamiálbmotforumis. Juoigamiin Beaska Niillas válddahalai Ánne ja gudnejahtii su.

– Mus leat olu lihkkosávaldagat Ánnii. Mii doarjut ja sávvat buori áigodaga jođiheaddjin. Ánne gal orui liikomin go bođii gal maŋŋá bottus sallut, lohká Beaska Niillas, gii oaidná dán ámmáha dehálažžan dasgo ON bistevaš eamiálbmotforum lea dehálaš sámiide.

– Ovttaskas sápmelažžii gal mearkkaša sámi oassálastin dáin čoahkkimiin ahte sámit ge besset doarjut ja veahkehit álgoálbmotoappáid ja -vieljaid miehtá máilmmi. Dáid čoahkkimiid bokte maid beassat ovttas loktet ja hábmet oktasaš áššiid dego ON julggaštusa eamiálbmogiid vuoigatvuođaid birra mii lea stuorra ávkin sápmelaččaide, go mii dan geavahišgoahtit, lohká son.

Jođiheaddjeevttohassange

Lihkkusávaldagat eai váilon. Norgga Sámediggi sávvá lihkku ámmáhiin ja lohká stuorra gudnin go sápmelaš lea válljejuvvon jođihit čoahkkima.


Govva Norgga ja Suoma Sámedikkit
 

– Min iežamet Anne Nuorgam lea válljejuvvon ON bistevaš álgoálbmotforuma jođiheaddjin. Sávan Ánnii návccaid ja vuoimmi dan dehálaš ámmáhis, čállá Norgga sámediggepresideanta Aili Keskitalo Facebook-siiddustis. Maiddái son lea New Yorkas ja ovddasta buot golbma Sámedikki ja vel Sámi ráđi.

Anne Nuorgam lea maiddái árvaluvvon jođihit ieš dan foruma giđa rájes. Oktiibuot 35 evttohasa leat dán ámmáhii. Oktii ovdal lea sápmelaš válljejuvvon dán ámmáhii. 2002 go forum ásahuvvui, válljejuvvui Ole Henrik Magga jođiheaddjin.

SÁMi ođasmagasiidna ii fitnen Anne Nuorgama ságaide.