Nmbu professora Tor A. Benjaminsen. Gova: nmbu.no/youtube

– Stádas ii leat vuođđu lohkat ahte guohtumat leat heajut

Stáhta iežas dutkamat čájehit ahte guohtoneatnamiin ja bohccodeattus ii leat mihkkege sivaid. – Stáhta orru baicce geavaheame dajahusa “heajos guohtumat” man nu eará siva geažil, lohká Tor A. Benjaminsen, gii ieš jođihii dutkamiid.

Klassekampen dat čállá maid Norgga biras- ja biodieđalaš universitehta professor Tor A. Benjaminsen lohká. Benjaminsen lohká ahte departemeanttas ii leat vuođđu heajos guohtuneatnamiid geavahit ággan geahpedit boazologu.

–  Eai leat dieđalaš ja ekologalaš duođaštusat dasa, manne boazologu galggašii geahpedit. Guohtumat eai leat guorban, čuoččuha Benjaminsen, gii jođihii njeallje jagi dutkanprošeavtta 2010 rájes, mas ulbmil lei geahčadit eiseválddiid ja boazodoalu gaskavuođaid. Leat stáhta iežas dutkamat, mat čájehit ahte guohtumat eai leat hedjonan ja ahte bohccogorudat eai leat gehppon. Benjaminsen lea kritihkalaš norgga Ráđđehussii.

– Mu mielas orru stáhta lohkame ahte fáktadieđut eai leat nu dehálaččat, ja orru baicce nu ahte geavahit dajahusa “heajos guohtumat”man nu eará siva geažil, lohká Benjaminsen.

Fertejit bissehit sisabahkkemiid

Sámediggepresideanta Aili Keskitalo lea duhtavaš, go professor jearrá kritihkalaš gažaldagaid ráđđehusa ektui.

– Lean lohkan dán raportta ovdal ja lea buorre go professor kritisere dál. Mu mielas gal lea maid oba imaš go lea sadji buot sisabahkkemiidda, muhto ii bohccuide. Ja jus Norgga eiseválddit duođaid oaivvildit ahte lea beare olu boazu, de han ledje galgat bissehit buot huksemiid ja eará sisabahkkemiid, go datge borret eatnamiid. Jus eai bisset daid ja beaivválaččat váldet areálaid boazodoalus, de bohtet álo lohkat ahte lea beare olu boazu, lohká Keskitalo. 

Eai gulahala gaskaneaset

Eanandoallodirektoráhta direktevra Liv Berit Hætta ipmirda go olbmot jerret manne lea sadji industriija ovdáneapmái, muhto ii bohccuide.

– Eanandoallodirektoráhta ii atte lobi huksemiidda, ruvkedoaimmaide jna. Dat leat eará instánssat. Min rolla lea hálddašit boazodoallolága. Mis ii leat vejolaš bissehit dakkár doaimmaid. Mii geahččalit suddjet boazodoalloareálaid. Mun ipmirdan go olbmot jerret dan birra, muhto mun in leat rievttes olmmoš dien vástidit. Dan fertejit vástidit politihkalaš dásis, lohká Liv Berit Hætta.

Son mieđiha ahte eai gulahala earet eará instánssaiguin, mat addet ovdamearkka dihte doaibmalobiid minerálafitnodagaide. 

– Mii eat daga dan. Dan dahká ealáhus ieš. Mii hálddašit boazodoallolága ja bargat guhkit ja oanehisáiggeplánaiguin boazodoalloguovllu ektui. Dat dat lea min bargu.