“Snøfrid ja Harald” (Ingá Márjá Sarre ja Ánte Siri) Govvejeaddji: Johan Mathis Gaup.

Snøfrid álgočájáhus bearjadaga

Snøfrid – álgočájálmas lea vuos álgovuorus Guovdageainnus dán bearjadaga ođđajagimánu 12.beaivvi ja de čájehuvvo Kárášjogas 17.beaivvi.

Snøfrid čájálmas lea čállon Snorre gonagasmuitalusa vuođul, mii gávdno Heimskringla girjjis. Norgga gonagas Harald, guhte šattai dovddusin “Hårfagre” namain, ráhkásnuvvái čáppa Snøfridii ja hilggui iežas gonagaslaš geatnegasvuođaid ja náitalii suinna ja ásaiduvvui sápmelaččaid lusa, čállá Sámi Našunálateáhter Beaivváš preassadieđustis.

Muitaluvvo ahte lei gonagasgárdimis Toftes Opplánddas, Dovrefjell lahka ahte Snøfrid ja Harald deaivvadeigga. Dat dáhpáhuvai go gonagas lei fitname Toftes juovllaid áigge. Juovlaruohta go Harald lei boradeame, bođii Svåse uvssa duohkai ja bivddii bálvvá doalvut sága gonagassii, cealkit ahte son dat lea dat sápmelaš geasa gonagas lei addán lobi cegget goađi nuppe beallái čoru. Gonagas mieđai boahtit olggos, ja vulggii Svåse mielde su goahtái.

“Goađis lei Svåse nieida Snefrid,  dat čábbámus nieida dain duovdagiin. Son fálai gonagassii juhkamuša. Gonagas válddii vuostá juhkamuša ja dan čalbmeravkaleames go guoskkehii sutnje, de báhkkanišgođii anistumiin ja háliidii su dakkaviđe. Muhto Svåse biehttalii ja dajai ahte gonagas ferte lobálaččat náitalit suinna. Gonagas válddii su moarsin ja náitalii suinna. Son ráhkistii su nu meariheamet ahte vajálduhtii riika ja iežas gonagaslaš doaimmaid.” Snorre gonagasmuitalusas sáhttit eambbo lohkat man mearihemiid Harald Hårfagre ráhkistii Snøfrida, eanet go ovttage eará, juoga mii earenoamážit bođii oidnosii go Snøfrid fáhkka jápma: “Gonagas čohkkái čađat su luhtte dainna doaivvuin ahte son fas ealáska. Gonagas moraštii golbma jagi ja riika álbmot moraštii go gonagas lei dájáskan.”  Ja jus mii fal galgat jáhkkit gonagasmuitalusaid dovdoseamos gáldui, na de leat norgga gonagasain sámi máddu.

Snøfrid čájálmas lea dan stuora ráhkisvuođa fámu birra, mii sáhttá vahágahttit muhto maiddái hukset, ja olbmo mátki seavdnjadasa čađa beassat čuovgadassii. Bihttá lea maiddái guovtti álbmoga birra mat leat eallán bálddalaga čuđiid jagiid, muhtomin ráfálaččat ja lotnolassii, muhtomin fas eahpeluohttámušain ja vašiin.

Čálli: Arne Berggren

Goziheaddji & muhtin teakstaosiid ja lávllateavsttaid čálli: Rawdna Carita Eira

Bagadalli: Haukur J. Gunnarsson

Jorgalan davvisámegillii: Britt-Inga Vars

Jorgalan lullisámegillii: Ellen Bull Jonassen

Jorgalan suomagillii: Anitta Suikkari

Koregográfa ja Bagadallanveahkki: Elle Sofe Henriksen

Lávdehábmejeaddjit: Bård Lie Torbjørnsen & Maja Von Hanno

Bivttashábmejeaddji: Berit Marit Hætta

Vuoiddashámat, hámát ja vuovttat: Trude Sneve

Čuovgahábmejeaddji: Steinar Lohne

Šuokŋadahkki: Olav Johan Eira

Neavttárat: Ingá Márjá Sarre (Snøfrid), Ánte Siri (Harald), Iŋgor Ántte Áilu Gaup (Svåse), Egil Keskitalo (Iljas), Mary Sarre (Áhkku), Anitta Suikkari (Sigurd), Anja Saiva Bongo Bjørnstad (Noaidi).

Lávdedoarrunkoordináhtor: Ingá Márjá Sarre

 

Álgočájálmas: 12.01.18 Guovdageainnus. Vuosttaščájálmas čájálmasmátkis lea Kárášjogas 17.01.18 – Eanet

Emneord: