Jon Remi (7) ja Marie Kristine (8) čájeheaba skealbmanigá, gii moive ja skelbmoša nu ollu go nagoda.

Skealbmanigá ivdne ja herve vuordináiggi

Šuhkoládaadveantakaleanddar ii leat šat mange veara, oaivvildeaba Jon Remi (7) ja Marie Kristine (8). Skealbmanigá, gii moive ja skelbmoša nu ollu go nagoda ja áinnas dan botta go leaba oađđime, lea juo olu suohttasat.

Maŋimuš juovllaid lea skealbmanigá fárren oba máŋgasiid geahčái. SÁMi ođasmagasiidna vulggii ohcat dakkár ruovttu, gosa skealbmanigá lea fárren. Rávdojogas, Kárášjogas, gávnnaimet skealbmanigá. Son oroda Jon Remi ja Marie Kristine Anti geahčen lávus, maid ieža leaba ráhkadan.

– Juo, deike fárre juohke jagi skealbmanigá. Skealbmanigá láve buot moivet dáppe. Diibmá lei mu biktasiid čatnan oktii ja teipen gitta láhttái. Barberensovtta lei maid vuoidan miehtá basadanlanja ja speadjala. Dán jagi lea earet eará guoros boahtaliid háddjen miehtá lanja ja giccudettiin juovlabeahcái, de lei máŋga kuvlla njeaidán láhttái, muitala stuorraoabbá Marie Kristine.


Skealbmanigá skelbmoša juohke ija juovllaid vuordináiggis. Bás-Nigáš gii oroda seainni sis, oahpaha ges juovlavieruid.

Eaba bala 

Jon Remi nivkkuha. Son lea ovtta oaivilis. Skealbmanigá lea skealbma ja muhtimin lea oalle bargu, go soai šaddaba oappáin čorget maŋŋel go ihkku lea skelbmošan.

– Lea gal oalle bargu. Beaivet dat ii daga maidege. Ihkku de ealáska, muitala Jon Remi, gii ii loga ballat das ii veaháge.

– Skealbmanigá ii leat váralaš, dadjaba oktii njálmmiid.

Oahppaba juovlavieruid

Ii leat dušše skealbmanigá gii boahtá. Bás-nigáš maid boahtá juohke juovllaid. Son orru seainni siste. Bás-nigážis lea sihke poastakássa ja sabehat olggobealde viesu.

– Dat dat lei vuosttaš nigá gii bođii. Vuosttaš juovllaid lei okto. Juovllaid vuordináiggis čállá goartta juohke beaivvi ja muitala juovlavieruid. Šuhkoládaadveantakaleanddar ii leat šat nu bivnnut obanassiige, reašká eadni Káre Máret.

Bás-nigáš muitala juohke beaivvi makkár doaimmat odne galget. Muhtimin leat bihpporgáhkut prográmmas, eará beaivvi lea čorget lanja, cahkkehit adveantagintala dahje lávlut. Nie ráhkkana bearaš juovllaide.

– Šilju dáhtui maid čorget, vai juovlanigá ii darván sáhpánráidduin, muitala Jon Remi.

Šuhkoládakaleanddar ii nu somá

Eadni ja áhčči leaba duhtavačča sihke Bás-nigážiin ja Skealbmanigáin.

– Lea hui somás vuohki ráhkkanit ja oahppat juovlavieruid. Šuhkoládakaleandara illá oba muitiba ge, lohká áhčči Jon Magne.

– Juohke iđida lea hui somá lihkkat geahččat maid dál lea dat Skealbmanigá dahkan. Mii leat viggan leat hui jaska go de dat lihkadišgoahtá, muhto eat mii leat vel oaidnán go Skealbma-Nigá ealáska. Ja Bás-Nigáš ii boađe viesus olggos ovdal go buohkat leat oađđime. Su eat leat oba oaidnánge. Diehtit dušše ahte lea ruovttus go sabehat ceaggájit seaidneguora, lohká eadni.