Sápmi min buohkaid váimmus

Lean dego seahkas njuiken maŋŋel máŋga jagi eret sámi mediamáilmmis. In leat olus bargan mediaáššiiguin sámi kultuvrra ja giela birra 2011 rájes. Mu redaktevrra rolla SÁMi ođasmagasiinnas ii leat go guokte vahku easkka bistán, muhto dál lean dovdagoahtán dan. Sámis dáhpáhuvvá nu olu, ja mii illudat ja moraštat ovttas. Jus fal dáhtut oaidnit, de juohke sajis, gosa guovllastat, de ovddiduvvo kultuvra ja giella man nu láhkai.

Mii oaidnit Sámedikki, mii ovddida sámeáššiid ja veahkkin láidesta ja ruhtada festiválaid ja eará kulturdoaimmaid. Sámedikki haga ii livčče sámi kultuvra nu oidnosis, iige doalaše nu alla dási go dál.

Mii oaidnit sámi festiválaid ja kulturdoaluid, mat jagis jahkái min guoimmuhit. Daidda bovdejit sámi ja eamiálbmot artisttaid ja kulturbargiid. Dat veahkehit dovddusin dahkat artisttaid ja dan láhkai leat oassin sin birgejumis, nu ahte kulturbargit besset bargat dan maid eanemus háliidit: ovddidit ja seailluhit kultuvramet.

Dán nummiris mii maid lohkat Kirsti Irene Johnsena birra, gii lea oahpahan čuohtenáre olbmo goarrut gávtti. Son lea hábmen gákteminstara juohke sturrodaga nammii, iige oba dieđe ge man olu minstariid lea vuovdán. Son lea maid mielde seailluheamen ja ovddideamen sámi kultuvrra. Son addá goarrunmovtta nuoraide ja erenomážit sidjiide, geat leat gielaset ja identitehtaset massán.

Dáid áiggiid lea maid luotnekampánnja leamaš jođus miehtá Norgga, ja dat ávžžuha min álo čoaggit golbma plastihkkaluoni, go finadat johka- dahje mearragáttis. Dát áŋggirdeapmi lea máilmmi dehálaš, ja dákkár áŋggirdemiid ollugat čuovvulit. Maiddái sámi perspektiivvas leamaš olu áŋgiruššamat, mii oaidnit daid ovdamearkka dihte Facebookas. Doppe ávžžuhit sámástit ja čállit dieđuid sámegillii. Doppe ávžžuhit čiŋadit gávttiin dávjjit go lávet.

Lea stuora illu beassat buot lágan kulturáššiid čuovvugoahtit fas. Daid birra čáledettiin ja muitalettiin beasan leat mielde seamma seailluhan- ja ovddidanvuogádagas, go Kirsti Irene ja eará kulturbargit.

Sávan buohkaide buori festiválageasi ja sávan - vaikko dal it álggatge kampánja, čuoččo lávddis, duddjo dahje politihkke – ahte bisánasttát veahá ja jurdilasttat. Movt sáhtán mun leat mielde seailluheamen kultuvramet ja giela?  

 

Emneord: