Prošeaktajođiheaddji Ellen Berit Dalbakk. Govven: Carl-Johan Utsi

Sámiráđđi ođasmahttá Sámi Duodjemearkka

Sámiráđđi lea bargamin Sámi Duodjemearkka ođasmahttimin. Ulbmil bargguin lea suddjet duoji ja sámi designa, ja maiddái buoridit duoji ja sámi designa gálvomearkan.

Ii doaimma nu go galggašii

Sámiráđđi ásahii Sámi Duodjemerkka 80-logus sámi duoji gálvomearkan. Ulbmil lei earret eará suodjalit sámi duoji áddestallama ja soahpameahttun gilvaleami vuostá ja čujuhit ostiide ahte gálvvu lea ráhkadan sápmelaš.

– Sámiráđđi oaivvilda ahte Sámi Duodjemearka ii doaimma odne nu go galggašii. Ovttas duodjeorganisašuvnnaiguin ja Sámedikkiiguin mii háliidat hukset buoret struktuvrra mearkka birra, sihke juridihkalaš ja kommersiálalaš, dadjá prošeaktajođiheaddji Ellen Berit Dalbakk preassadieđáhusas, gii lea Skániin eret ja lea ieš duojár.

Árvolassáneapmi lea buorre sámi servodahkii

Prošeakta lea dál ovdaprošeaktan, ja Sámiráđđi gulahallá duodjebirrasiiguin gávnnahan dihte movt galgá joatkit bargguin.

– Oassi barggus dán dásis lea maiddái buoridit duoji gálvomearkan. Ulbmil lea earret eará ahte turisttat geat bohtet Sápmái galget diehtit ahte mearka gávdno juo ovdal sii bohtet; sii galget háliidit oastit duoji ja sámi designa main lea Sámi Duodjemearka. Sámiráđđi háliida doarjut árvolassáneami sámi servodaga buorrin, dadjá Dalbakk.

Bovde duodjeorganisašuvnnaid ovttasbargui

Oassin barggus Sámiráđđi lágida gulahallanseminára “Mo suddjet duoji?” Anáris disdaga miessemánu 22. beaivvi. Beivviid maŋŋil gulahallanseminára lágiduvvo ges Sámi njálmmálaš árbevieruid konferánsa Anáris, mas lágideaddjit leat sámedikkit ja Sámiráđđi.

– Midjiide lea áibbas dehálaš oažžut oaiviliid ja oainnuid sámi servodagas dán barggus. Mii háliidat gulahallat duodjeorganisašuvnnaiguin, duojáriiguin, earáiguin geain lea seammá ulbmil ja eará berošteddjiiguin. Mii fertet ovttasbargat nu ahte Sámi Duodjemearka šaddá ávkin sámi servodahkii, nanne Dalbakk.

Sámiráđi bargu ođasmahttit Sámi Duodjemearkka lea ožžon ruhtadoarjaga EU-prográmmas “Northern Periphery and Arctic Programme”. Prográmma háliida ahte álgoálbmotprošeavttat galget ohcat ruhtadoarjaga sis, ja Sámiráđđi hástá earáid iskat prográmma.

Sámiráđđi lea juo čađahan ovtta prošeavtta Sámi Duodjemearkka ealáskahttima ektui. Das čađahuvvui 2015s ja 2016s ja oaččui norgga beali Sámedikkis ruhtadoarjaga.

Sámiráđi birra

Sámiráđđi lea Suoma, Norgga, Ruošša ja Ruoŧa sámi organisašuvnnaid eaktodáhtolaš ja iešráđálaš kulturpolitihkalaš ja politihkalaš ovttasbargosearvi.Sámiráđđi lea nu gohčoduvvon NGO (non-governmental organization).