Sadjásaš redaktevra Ánne Biret Anti sávvá lohkkiid bures váldet vuostá rievdademiid SÁMi Ođasmagasiinnas. – Eanemusat sávan mii leat ávkin min lohkkiide, lohká Anti.

SÁMi Ođasmagasiidna ođđa hámis

Dás duohku rievdadat SÁMi Ođasmagasiinna ja sávvat don liikut min ođđa reportášaráiddu sámi árbevieruid birra seammas go oahpat earet eará gohkket min árbevirolaš biebmuid.

– Mii rievdadat magasiinna hui veahá, juoga mii lea áibbas lunddolaš go ođđa redaktevra váldá badjelasat bargu. SÁMi Ođasmagasiinnas gávnnat ain buriid reportášaid min valljis ja rikkis kultureallimis, muhto dasa lassin dáhtut fásta ráiddu gos earet eará dáhtut árbevirolaš máhtu fievrridit nuorat bulvii, ja maiddái mu ahkohaččaide, geat eai leat nu viššalit dáhttun nuorran oahppat nugo biđđit, suovastit bierggu ja nu ain. Mis maiddái joatká fálaldat máttasámiide ja áinnas dáhttut diehtit maid dii Mátta-Sámi háliidehpet lohkat, lohká sadjásaš redaktevra Ánne Biret Anti. 

Árbevirolaš biebmu

Dán magasiinnas fitnat Mama Sara mielde jokŋeme. Son muitala iežas barggus Masaid mánád veahkehit. Seammas tipset movt njálgga ja álkkes jokŋameastu ráhkadat. 

–Nu movttáskin go nie álki lei jokŋameastu vuoššat ja fierrut. Dás rájes in oastte gárvves meastu. Nu máilmme njálggat šaddá go ieš dan dahká. Mun duođaid sávan oallusat ožžot ávkki artihkkaliin mat ilbmet dađistaga. Diehtelasat eatnašat varra máhttet gohkket ja málestit sámi árbevirolaš biebmu, muhto eai buohkat máhte ja muhtimin lea buorre ođđa tipsaid ge oažžut, hásttuha Anti ja sáhttá dál juo muitalit ahte lea vuolgime gárdde lusa čuovvut njuovvama, duostut vara ja bassat čoliid.

– Dalle áiggun ges gumpustit ja márfut. Dán jagi áiggun návehis ge fitnat viežžat gássi. Mii geahččalit čuovvut áigodagaid ja goas maid dohkke dahje válmmasta. Dát bargu dieđusge ádjáná, muhto duođaid illudan. Dan áiggi maid dásá geavaha gal berren oaidnit ávkin, ja sávan sii geat eai leat geahččalan dáid bargguid čuovvulit vai ovttas seailluhat kultuvrramet, lohká Anti.

Beakkálmasaid árgabeaivi

“Mii – Gii – Goas” spálta ii jávkka oalát, muhto ii oaččo nu olu saji šat áviissas. Magasiinnas jávká maid dárogiel MGG.  

– Dan sajis bohtet eambbo ođđasat, reportášat, giellacavgileamit, gažaldatráiddut, diiddat ja mii beassat maid geahčastit maid sámi beakkálmasat dahket. Šaddá gelddolaš oaidnit maid sii dahket go eai leat lávddis. Moai magasiinna uhca doaimmahusas letne plánen dán bures, ja ovttas freelanceriiguin mii illudat geahččalit juoida ođđasa. Sávan donge válddát oktavuođa minguin, vai diehtit maid aiddo don háliidivččet oahppat gohkket, duddjot dahje dahkat. Mii sávvat ahte oaččut ávkki magasiinnas ja sávvat maid juksat eambbo lohkkiid,  lohká Anti.

Cavgilemiid ja magasiinna diŋgomiid mailet info@samimag.no dahje abo@samimag.no  e-poastačujuhusaide.

Jus diŋgot ja mávssát ovdal 29.10.18 de leat mielde MAC Book Air (128 gb) -dihtora vuorbádeames. Jus mávssát Vippsain de oaččut girjji vel skeaŋkan. Loga eambbo dás.