GLR redaktevra Nils Martin Kristen jearahallame Sámediggepresideantta Aili Keskitalos Sámedikki dievasčoahkkima oktavuođas. Dás rájes veahkaha SÁMi Ođasmagasiidna dáid jearahallamiid dahkat. - Ja SÁMi Ođasmagasiidna ožžot ges mis veahki go moai dáppe Guovdageainnus ges čađahetne jearahallamiid ja govvetne sin ovddas, čilge Kristensen. GOVVEN: SÁMi Ođasmagasiidna

SÁMi ođasmagasiidna ja GLR ovttasbargagohtet

SÁMi ođasmagasiidna ja Guovdageainnu Lagasrádio ovttasbargagohtet. Doaimmahusat lonohallagohtet áššiid ja bargguid.

JEARAHALLI ÁŠŠIS : GLR; ISAK NILS HÆTTA

HEIVEHAN: NILS EGIL GAUP

 

– Dáinna ovttasbargguin šaddet SÁMi ođasmagasiinnas eanet ságat Guovdageainnus ja Kárášjohkalaččat bessetges gullagoahtit eambbo Kárášjoga ságaid Guovdageainnu Lagasrádios, čilge SÁMi ođasmagasiinna redaktevra Ánne Biret Anti áiddo álggahuvvon ovttasbarggu birra.

- Nannet guokte uhca doaimmahusa

Sihke SÁMi ođasmagasiidna ja GLR leat smávva doaimmahusat. SÁMi ođasmagasiidna lea goalmmát jagi doaibmame ja www.samimag.no neahttaođđasiid lassin ilbmá magasiidna oktii vahkkui.

– Dálá dilis eat oaččo preassadoarjaga iežamet doibmii, nugo Ávvir ja Ságat. Mii doaibmat eaiggátruhtademiin ja prošeaktadoarjagiiguin. Mii geahččalit fállat áigeguovdilis reportášaid ja čiekŋalat ođasartihkkaliid miehtá Sámi. Unna doaimmahusain lea leamaš gal hástalussan go doaimmahusas ii leat go redaktevra olles virggis ja magasiidnabardi beallevirggis. Moai ráhkadetne guovttá magasiinna, earet reportášaid ja áššiid maid oastit erenoamážit Mátta-Sámi guovllus. Guovdageaidnu lea stuorámus sámi suohkan, ja doppe leat áššit mat gusket miehtá Sámi, nu ahte illudan sakka lonohallagoahtit áššiid GLR:in, lohká Anti.

Guovdageainnu Lagasrádios ge leat guokte bargi ja velá eaktodáhtolaš bargit. Vuossárggas duorastahkii sádde GLR ođas- ja áigeguovdilis sáddagiid diibmu 1600 rájes. Sáddaga sáhtát gullat sihke www.glr.no neahtas ja nuppádassii rádios beaivvi maŋŋel. GLR:s lea sáddenlohpi Kárášjogas ja doppe gulat GLR FM 104,5 dahje FM 106,8 rádiofierpmádagas.

– Ovttasbargojurdda lea mis leamaš máŋga jagi juo. Go mu ovddeš Min Áigi -kollega Anne Berit Anti šattai redaktevran SÁMi ođasmagasiinnas, ja bivddii ovttasbarggu, de šattai dat fas hirbmat áigeguovdilin. Anti lea hirbmat čeahpes journalista  ja illudat ovttasbargagoahtit.


SÁMi Ođasmagasiinna redaktevra Ánne Biret Anti illuda ovttasbargagoahtit GLR:in. – Lea ávkin sihke doaimmahusaide ja velá lohkkiide, lohká son. 

Dáhttut eambbo guldaleddjiid Kárášjogas

GLR:s leat dál juo guldaleaddjit Kárášjogas, namalassii Radio Bingo -sáddagis, mii lea juohke duorastaga eahkeda. GLR dárbbaša eambbo guldaleddjiid maŋŋelgaskabeaivvi sáddagiidda ge. Ovttasbargu nanne goappašat doaimmahusaid ja lasiha goappašagaid sisdoalu.

– Mii dárbbašit eambbo guldaleddjiid Kárášjogas. Ii dušše dalle go lea rádiobingo, muhto maiddái maŋŋelgaskabeivviid. Mii dárbbašit servodatdigaštallama doppege, ja mii dáhttut šaddat buorebut das. Ovttasbargu SÁMi ođasmagasiinnain ja Ánne Biret Antiin nanne dan, go son dovdá Kárášjoga servodaga ja Sámedikki bures. Justa nie beassá SÁMi ođasmagasiidnage ávkkástallat mis, lohká Kristensen.

– Mii leat álggahan ovttasbarggu juo odne ja vuosttaš ovttasbargu lea dát ovttasbargoođasášši. GLR doaimmaheaddji lea jearahallan dál mu ja Kristensena. Ášši gullo sihke GLR:s ja sáhtát lohkat dan min neahttamagasiinnas. Lea obanassiige dehálaš ahte smávit mediafitnodagat ovttasbarget, amamet hávkat ja jávkat stuorát mediaid ektui, illuda Anti.