Anja Saiva Bongo Bjørnstad ja Anitta Suikkari boahtiba Stamsundii sámi stunt-teáhteriin, mii doarju boazodoalu «Pop-up Sápmi» prošeavttas. Govva: Tomi Guttorm

Sámi gáhtadáidda Lofuhtii

Sámi lávdedáiddárat leat mielde dán jagi teáhterfestiválas Stamsundas gáhtadáidagiin.

– Lofuohtas leat eambo sápmelaččas go mii gáddit, dadjá Ada Einmo Jürgensen preassadieđáhusas. Son jođiha sámi lávdedáiddasearvvi, Sámi Lávddi, mii lea álggahan «Pop-up Sápmi» prošeavtta.

Sámi dáidagat leat stuorra oassin dán giđa lávdedáidagis Norggas. Prográmma johtá, ja dáiddárat ceggejit lávu ja sirddašit dan miehtá Stamsunda, ja čájehit sámi gáhtadáidaga. Prográmmas lea luohti, dánsun, musihkka ja neaktin, dasa lassin maiddái visuála design. Dat šaddá oinnolaš oassi festiválas.

Sámi julggaštus

Stamsunda teáhterfestivála jođiheaddji, Thorbjørn Gabrielsen, lohpida ođđaáigásaš jurddašeami dán jagi festiválas, mii lágiduvvo 18. háve.

– Mii oaidnit sámi dáidaga seamma lunddolaš oassin festiválas go Davvi-Norgga earáge dáidaga. Danin mii leat bovden sámi teáhterbirrasa deike čájálmasaiguin. Šaddá dego sierra festivála festivála siste, muitala son movttegit.

Mielde leat Kristin Nango, Sarakka Gaup, Anitta Suikkari, Mikkel Gaup, Mary Sarre, Mette Brantzeg, Hilde Skancke Pedersen, Anja Saiva Bongo Bjørnstad, Ingá Márjá Sarre, Stina Therese Lorås Hessaa, Elisabeth Heilmann Blind, Åsa Simma, Siri Broch Johansen, Ada Einmo Jürgensen, Marianne U. Kappfjell, Kenneth Hætta ja Johan Sara jr.

– Sámi čeahpimus dáiddárat dat bohtet guoimmuhit Stamsundii, dadjá Gabrielsen.

Sámi vuođđudeaddjit

Stamsund Internasjonale Teaterfestival (SIT) lea dálá áiggi čalmmustahtti riikkaidgaskasaš lávdedáiddafestivála, mii ovdanbuktá sihke iežas ja earáid buktagiid.

Sámi teáhterat Beaivváš Sámi Nationálateáhter ja Åarjelhsaemien Teatere leigga mielde vuođđudeamen festivála, ja leat galledan festivála buktagiiddisetguin máŋgii dan rájes.

– Lofuohta lea guovlu mas lea iežas sámi historjá, bures čihkkojuvvon earáin, maiddái otná beaivvi. «Pop-up Sápmi» Lofuohtas galgá dutkat kultuvrralaš árbbi, ja ráhkadit deaivvadanbáikkiid, main dat gártá njunnálaga dálááiggiin, dadjá Ada Einmo Jürgensen Sámi Lávddis. Tråante ávvudoalut, main čalmmustedje 100 jagi vássima vuosttaš sámi riikkačoahkkima rájes, lihkostuvve bures. Dat leat bajidan beroštumi sámi dáidagii, oaivvilda son.

Norgga kulturráđđi lágidii 2017 loahpageahčen konferánssa, man fáddán lei «Sámi suhttu». Dat attii Sámi Lávdi -searvái inspirašuvnna joatkit sámi dáidaga vuoruheami, ja loktet áddejumi dan hárrái mii Sápmi lea.

«Pop-up Sápmi» Stamsunda riikkaidgaskasaš teáhterfestiválas lágiduvvo miessemánu 31.beaivvi rájes gitta geassemánu 2. beaivái.

Emneord: