Sámediggi lea nammadan lahtuid boazodoallostivrii

Sámediggi ja Eanadoallo- ja biebmodepartemeanta leat soahpan ahte geahčadit boazodoallostivrra nammadeami nannen dihtii sámi mieldeváikkuheami. Sámediggeráđđi lea dál nammadan lahtuid boazodoallostivrii jagiide 2019-2023.

– Boazodoallostivrras lea deaŧalaš doaibma ja meannuda ollu áššiid mat gusket boazodollui. Danne leat mii hui ilus go leat soahpan nannet boazodoallogelbbolašvuođa stivrras. Sámediggeráđđi lea nammadeames golbma lahtu ja várrelahtuid čuvvon evttohusaid maid earret eará Norgga Boazosápmelaččaid Riikasearvi (NBR) lea ovddidan árat dán áigodagas, dadjá sámediggeráđđi Silje Karine Muotka preassadieđáhusas.
 

Sámediggeráđđi lea nammadan čuovvovaččaid dábálaš lahttun boazodoallostivrii áigodahkii 2019 - 2023:

  • Inge Even Danielsen
  • Inger Marie Gaup Eira
  • Leif Anders Somby

Várrenlahtut leat:

  • Bjørn Thomas Åhren
  • Inger Marit Eira Åhren
  • Anders Somby jr

 

Soahpan nannoset mieldemearrideames
Sámediggi mearridii 2016:s boazodoallodieđáhusa meannudeames ahte Sámediggi ii nammat lahtuid boazodoallostivrii, dan sivas go stivra dássážii ii leat doaibman bures. Sámediggi ja Eanandoallo- ja biebmodepartemeanta leat konsultašuvnnaid bokte soahpan nannet sámi mieldemearrideami ja boazodoallofágalaš gelbbolašvuođa boazodoallostivrra nammadeames boahtteáiggis.

Dasa lassin lea Sámediggeráđđi árjjalaččat evttohan namaid vejolaš jođiheaddjin boazodoallostivrras. Otnáš ortnega mielde boazodoallolága § 71 mielde galgá Sámediggi nammadit golbma lahtu ja stáhta fas nammada njeallje lahtu. Stivrajođiheaddji válljejuvvo stáhta evttohusaid gaskkas.

- Mii vuordit ain buori ja konstruktiiva gulahallama Eanadoallo- ja biebmodepartemeanttain viidáset proseassas go stáhta nammada stivrajođiheaddji ja eará stivralahtuid, dadjá Muotka.
 

Evttohuvvon láhkarievdadus ii ovddiduvvon Stuorradiggái
Jagi 2019 guovvamánu álggus ovddidii departemeanta láhkarievdadusa gulaskuddamii, mas lei maiddái evttohus rievdadit § 71 boazodoallostivrra nammadeame. Das evttohii departemeanta rievdadit lága nu ahte Sámediggi ii šat galgga nammadit lahtuid stivrii, muhto ahte sáhtii. Dát evttohus gessojuvvui, iige meannuduvvon Stuorradikkis. Stuorradikki ealáhuslávdegoddi meannuda dál proposišuvnna boazodoallolága rievdadusaid birra.

- Lea hui buorre go mii leat soahpan nannet sihke sámi mieldeváikkuheami, muhto maiddái ahte boazodoallofágalaš gelbbolašvuohta ja máhttu sámi kultuvrras ja servodagas deattuhuvvo boazodoallostivrra nammadeames boahtteáiggis, dadjá sámediggeráđđi Silje Karine Muotka.