Sámediggeráđđi Mikkel Eskil Mikkelsen sávvá olusat celket oaiviliiddaset oahppoplánaide. Govven: Torgrim Halvari

Sáhtat váikkuhit sámi oahppoplánaide

Dál leat vuođđo- ja joatkkaskuvlla ođđa oahppoplánaárvalusat gulaskuddamis. Nu maiddái sámi skuvlla, sámi gielaid ja sámi parallealla seammaárvosaš oahppoplánat. – Mii háliidit ahte nu olusat go vejolaš buktet gulaskuddancealkámušaid, dadjá sámediggeráđđi Mikkel Eskil Mikkelsen

Sámedikki bealis lea leamaš stuora fuomášupmi dasa ahte sámi sisdoalu oččodit oahppoplánaide, sihke našunála ja sámi plánaide. 

Dáhttut eastadit guottuid

Sámediggái lea leamaš dehálaš ahte buot oahppit Norggas galget oažžut doarvái máhtu sápmelaččaid birra, sámi historjjá, kultuvrra, servodateallima ja vuoigatvuođaid birra. Leat ain olu sámi mánát ja nuorat geat vásihit váivves cealkámušaid ja heajos guottuid sin vuostá, mii doaivvu mielde boahtá das ahte váilu diehtu sápmelaččaid birra.

– Mii fertet bargat dan ovdii ahte oahppoplánat šaddet buorren reaidun máhtu loktet, mii fas eastada negatiivvalaš cealkámušaid ja guottuid. Danne dárbbašit mii cealkámušaid ahte leago sámi sisdoallu doarvái bures vuhtiiváldojuvvon našunála oahppoplánain, dadjá Mikkelsen preassadieđáhusas.

Nannet sámi sisdoalu

Sámi oahppoplánain galgá leat nannejuvvon sámi sisdoallu, mii mielddisbuktá ahte ferte heivehit oahpahusa nu ahte vuođđun leat sámi árvvut, sámi gielat, kultuvra ja servodateallin.

– Sámediggái lea hui dehálaš ahte sámi skuvllat ja earát buktet cealkámušaid das ahte leatgo sámi gielat, kultuvra ja árvvut sajáiduhtton buori vuogi mielde sámi giela ja sámi parallealla seammaárvosaš oahppoplánain, loahpaha Mikkelsen.

Gulaskuddanáigemearri lea geassemánu 18. beaivvi 2019. Máhttodepartemeanta mearrida oahppoplánaid 2019 čavčča ja dat váldojuvvojit adnui go skuvla álgá čakčat 2020.