Røros juovlamárkaniin fidnet vaikko maid, muhto min doaimmaheaddji livččii sávvan eambbo sámi buktagiid doppe gávdnat.

Røros juovlamárkanat logi jagi juo

Røros márkanat, mat lágiduvvojit guovvamánus, leat guhká geasuhan eanemus olbmuid buot Trøndelága márkaniid gaskkas. Dál lea logát jahki go doppe lágidit juovlamárkaniidge, ja dat orrot geasuheamen olbmuid seammá bures go guovvamánu márkanatge.


Juohke jagi galledit miljovdna mátkkošteaddji Rørosa. Juovlamárkaniid áigge sii besset vásihit juovlamiela, vaikko dal de eai beassange nu olu sámevuođa vásihit. 

2008 go juovlamárkanat ledje vuohččan eai lean go moadde olgogávppi. Dál márkanat bistet njeallje beaivvi ja leat šaddan juo oalle álbmotfeastan. 

Máŋgalogi gávppáža leat searvan márkaniidda ja doppe vuvdet sihke gahpiriid, duljiid, guoli, bierggu, niibbiid ja eará dávviriid. Røros lea áiddo beliid laktojuvvon sámi giellahálddašanguvlui, ja lea historjjálaččat dehálaš sámeguovlu. Dat ii olus vuhtto márkaniin, go doppe leat dušše guokte

sámi gávppáža: Røros Rein, mii vuovdá bohccobierggu ja Ole Pentha gii vuovdá sáltejuvvon, goikaduvvon ja suovastuvvon bierggu.

 

 


Rørosrein Eva Nordfjell lea juohke jagi Røros juovlamárkaniin vuovdaleame bierggu

Pentha lea leamaš njeallje háve gávppiinis Røros juovlamárkaniin ja lea hirbmat duhtavaš.

– Olbmot ostet eanaš biergobuktagiid ja oastit leat sihke buori mielas ja movtta gávppašit, mojohallá Pentha gii maid sávašii eambbo sámi gávpejasaid márkaniidda.


Ole Pentha lea hirbmat duhtavaš Rørosa juovlamárkaniin. Sus leat fuolkemánát Sanna Granedjell ja Felix Grunde Pentha veahkkin. Sanna mielas lea hirbmat hearvái ádjá čuvodit ja leage njealját geardde jo dáppe.

Røros lea mielde UNESCO listtus ja gullá báikkiide, maid galgá gáhttet. Rørosas fitnetge birrasiid miljovdna turistta juohke jagi. Eanaš gávppit ožžotge váldodietnasa das go fállet mátkkošteddjiide duon dán buktaga ja fálaldaga. Maiddái juovlamárkaniid galledit olgoriikkalaččat ja buvddaid gaskkas gullojit olbmot šurrame sihke ruošša-, kiinná-, eaŋgalas- ja eará gillii. 


Albma juovlanigáčuojaheaddjit gal fertejit leat juovlamárkaniin. 

SÁMi ođasmagasiidna sávašii eanet sámi gávppiid searvat Rørosa márkaniidda. Dássážii eai oro vel oallugat fuomášan vejolašvuođa sámi kultuvrrain ja dujiin olahit máilmmi justa fal Rørosas. Soitet boahtte jagi eambbosat?