Sámediggeráđi Silje Muotka riŋgii Norgga Eanandoalloministarii.

Riŋgii eanandoalloministarii

Sámediggeráđi Silje Muotka riŋgii Norgga eanandoalloministarii. – Ávžžuhin sin vuordit bággonjuovvamiin dassái go ON olmmošvuoigatvuođalávdegoddi lea cealkán áššis.

Jovsset Ánte Sara ášši čuozai nu garrasit Sámediggeráđđái, ahte sámediggeráđi Silje Muotka válljii riŋget Norgga eanandoalloministtar Bård Hoksrudii (Ovddádusbellodat).

 – Mun adden čielga rávvaga ahte lea buoremus diktit orrut Jovsset Ántte ášši, ahte eai bija johtui bággodoaimmaid ovdalgo mii diehtit maid ON olmmošvuoigatvuođalávdegoddi cealká. Son ii buktán makkárge čielga vástádusa gal munnje ahte vurdetgo vai eai, muitala sámediggeráđi Silje Muotka SÁMi ođasmagasiidnii.

Muotka muitala departemeantta politihkalaš jođihangotti čuovvut ášši beaivvis nubbái, ja ahte sin mielas dásseárvu lea dehálaš.

– Čilgejin dange beali ahte boazodoalu nationála dillái ii váikkut mange láhkai, jus sii diktet ášši orrut dassái go diehtit maid riikkaidgaskasaš dásis celket. Ii lohpidan maidege, iige lohpidan árvvoštallat Sámedikki dievasčoahkkincealkámuša, muhto logai gal áigut lohkat cealkámuša go dat gárvána, čilge Muotka.