Sámedikki politihkalaš ráđđeaddi Eirik Larsen lea Genevas iskame bissehit Norgga stáda bággonjuovvanplánaid. PREASSAGOVVA

Raporteren stáda bággonjuovvanplánaid ON:i

Sámediggi lea Ovttastuvvan Našuvnnaid nállevealahanlávdegoddái raporteren Norgga stáda plánaid bákkus njuovvat Jovsset Ánte Sara ealu ovdal go ON olmmošvuoigatvuođalávdegoddi lea beassan geahččat ášši.

– Mii leat fárrolágaid Sámeráđiin Genevas, Nállevealahanlávdegottis, geahččaleame bissehit Norgga plánaid bákkus njuovvat Jovsset Ánte Sara ealu, dassái go ON olmmošvuoigatvuođalávdegoddi gieđahallá Jovsset Ántte guoddaleami. Sámedikki dievasčoahkkinge gieđahallá ášši dán vahkus ja cealká áššis, lohká Sámedikki politihkalaš ráđđeaddi Eirik Larsen.

Juohke jagi Norga raportere ON nállevealahanlávdegoddái čuvvot go sii ON konvenšuvnnaid. Sámediggi ges raportere iežaset bealis. Dál leaba bealálaččat raporttas ovdanbuktán. Ihttin ja duorastaga ON nállevealahanlávdegoddi gažada Norgga konvenšuvnnaid ektui. Dan maŋŋá gullat duomu.

– Sáhttá sulastahttit duopmostuolu, muhto ii leat gal. Duomus Nállevealahanlávdegoddi cealká leago Norga čuvvon konvenšuvnnaid ja maid Norga berre dahkat, čilge Larsen.

Norgga delegašuvnnas leat iešguđetge departemeanttaid ovddasteaddjit, ja dan jođiha Mánáid-, ja dásseárvoministtar Linda Hofstad Helleland. Sámedikki ovddasta politihkalaš ráđđeaddi Eirik Larsen, geas lea nana duogáš, go lea ovdal bargan sáme áššiid juristan Gieldadepartemeanttas ja jođihan Sámeráđi olmmošvuoigatvuođaossodaga.

– Mii leat cealkán movt stáda lea láhtten Jovsset Ántte áššis, ja vaikko eat beasa Norgga gažadeames cealkit maidege, de mii leat ovdanbuktán Sámedikki oainnu ja seammás čoahkkinastán iešguđetge olbmuiguin dáppe. Vaikko lea ON Olmmošvuoigatvuođalávdegoddi, mii galgá Jovsset Ánte Sara áššis vástidit, de lea dehálaš raporteret Nállevealahanlávdegoddái ahte stáda dáhttu bákkus njuovvat ovdalgo ON cealká áššis. Mii diehtit dán lávdegotti ovdal bissehan ovdamearkka dihte Rönnbäckena ruvkeplánaid, mat ledje váidojuvvon riikkaidgaskasaš orgánaide. Mun jáhkán ahte buot cealkámušat ja dágut lea veahkkin Jovsset Ántii dál.

ON Nállevealahanlávdegoddi ja Olmmošvuoigatvuođalávdegoddi ii láve cealkit áššiid hárrái maidege ovdalgo duopmu lea celkojuvvon.