Ráđđehus illuda ealáhusovdáneami dihte, muhto Sámediggi lea hirpmahuvvan. – Dát goddá vuona, váruha sámediggeráđi Silje Muotka. Fálesnuori suohkana govva

Rahpet Nussira ruvkedoaimmaid

Ráđđehus ii guldalan Sámedikki. Dál suvvet Nussirii álggahit ruvkedoaimmaid ja ruvkebázahusaid gurret njuolgga vutnii.

Ráđđehus ávvuda ealáhusovdáneami ja Fálesnuori ođđa bargosajiid geažil, muhto Sámediggi lea hirpmahuvvan.

– Ráđđehus goddá dál vuona. In oba ipmir ge movt dan leat oba nagodan ge mearridit. Mu čalbmái čuohcá ahte Ráđđehus ii guldal Sámedikki, lohká sámediggeráđi Silje Muotka.

Guoddala mearrádusa

Nussira ruvkedoaimmaid leat máŋggas váruhan, go plánejit ruvkebázahusaid rádjat Riehpovuona bodnái. Vaikko Nussira ruvkedoaimmahagas lohket, ahte bázahusaid vurken vutnii ii billis vuona, de eai Sámedikkis loga dan duohtan.

– Sii illudit 150 bargosaji ovddas. Mun fas jáhkán ahte dat eai leat go oanehis botta bargosajit. Ráđđehus han galggašii baicce suddjet bargosajiid mat leat juo guovllus. Dát ii billis dušše vuona, muhto maiddái mearrasámi ja boazodoalu ovdii, lohká beahtahallan Muotka ja lohká Sámedikki dál guoddalit mearrádusa Gonagasa dássái.

Luonddugáhttensearvvit dieđihit ahte čađahit akšuvnnaid.