Sámedikkepresideanta Aili Keskitalo. Govven: Sara Beate Eira Persson/Sámediggi

Plassje sámegielaid hálddašanguvlui

Ráđđehus mearridii maŋŋebargga lahttudit Plassje suohkana Trøndelágas sámegielaid hálddašanguvlui suoidnemánu 1.b rájes.

Ráđđehus mearridii maŋŋebárgga lahttudit Plassje suohkana Trøndelágas sámegielaid hálddašanguvlui suoidnemánu 1. beaivvi rájes dán jagi. Dát čuovvu ráđđehusa dáhtu ovdánahttit ja nannet lullisámegiela.

Evttohusas reviderejuvvon nationála bušehttii 2018 lea evttohuvvon lasihit juolludeami Sámediggái 2 miljovnnain gokčat lassigoluid. Jagi 2019 rájes juolluduvvo 4 miljovnna ruvnno jahkásaččat.

Stuorra lávki ovddos guvlui

Sámedikke presideanta Aili Keskitalo, geas lea ovddasvástádus dán suorggis, lea hui ilus Ráđđehusa mearrádusas.

– Lea stuorra lávkki ovddas guvlui, njealját suohkana lullisámi guovllus. Lullisámi guovlu han lea nu stuoris, dadjá Keskitalo oanehaččat SÁMi ođasmagasiidnii.

Presideanta oažžu gažaldahkan ahte leago son duhtavaš ahte mearrádusa olis leat maiddái ožžon lasihuvvot stáhtabušeahtta bokte 2 millijovnna kruvnnu doarjaga.

– Dan fertet dárkilabbot árvvoštallat, muhto ii leat nu guhkkin eret dan maid ovdal lea biddjon go bohtet ođđa suohkanat hálddašanguvlui, loahpaha son.

Áitojuvvon giella

Plassje lea okta guovddášguovlu lullisámegiela dáfus. Lullisámegiella lea klassifiserejuvvon duohta áitojuvvon giellan UNESCO áitojuvvon gielaid rukses listtus, ja lei ovtta gaskka várra ahte galggai oalát jávkat.

Muhto maŋemus jagiid lea leamaš positiivvalaš ovdáneapmi. Erenoamážit nuoraid gaskkas lea beroštupmi oahppat ja geavahit lullisámegiela lassánan.

Vásáhusat eará suohkaniin mat leat searvan hálddašanguvlui, čájehit ahte giella lea ožžon alit stáhtusa dáin guovlluin.   

– Mus lea stuorra beroštupmi nannet ja seailluhit lullisámegiela ja kultuvrra. Dan dihte lean ilus go Plassje dál šaddá oassin sámegielaid hálddašanguovllus, dadjá gielda- ja ođasmahttinministtar Monica Mæland preassadieđáhusas.

Plassje suohkanstivra mearridii ovttajienalaččat ohcat ahte suohkan galgá šaddat oassin lullisámegiela hálddašanguovllus. Trøndelága fylkkasuohkan lea dorjon ohcama.

–  Lea dehálaš ahte sámegiela ja sámi kultuvrra ovdánahttinbargu dahkko báikkálaččat ja doppe gos sámit orrot. Ráđđehus lea dan dihte positiivvalaš dasa ahte suohkanat ohcet lahttuduvvot hálddašanguvlui, dadjá Monica Mæland.

Guoktenuppelohkái suohkana

Sámegielaid hálddašanguovllus lea sámegiella ja dárogiella ovttadássásaččat.

Dáin suohkaniin lea buohkain riekti beassat oažžut bálvalusa sámegillii go sii váldet oktavuođa almmolaš ásahusaiguin guovllus. Ássiin lea maid eanet vuoigatvuođat oažžut oahpahusa sámegielas.

Go Plassje dál lahttuduvvo hálddašanguvlui, de leat hálddašanguovllus oktiibuot guoktenuppelohkái suohkana Finnmárkkus, Romssas, Nordlánddas ja Trøndelágas.

Plassje šaddá njealját lullisámegielsuohkan hálddašanguovllus.

 

Emneord: 
Tags: