Pippi lea oahppan sámegiela

Bearjadaga šaddá albma leahttu Villa Villakullas, go sámegiel Pippi Nallesuohkku vuosttaš geardde ihtá teáhterlávdái Guovdageainnu kulturviesus. Vuos leat golbma eahkeda Guovdageainnus ja de álgá čájálmasmátki, ja sihke ábegáhttu, heasta, golleruđat ja villa leat mielde.

Beaivváš Sámi Teáhter lea vuosttaš teáhter, mii oahpaha Astrid Lindgrena Pippi sámástit. Elle Sofe Sara lea bagadallan Pippi-čájálmasa. Son lea ámmát dánsejeaddji ja lea bargan koreográfan máŋggaid dánsen – ja teáhterčájálmasain. Son lea maid bagadallan moadde oanehisfilmma, muhto ii teáhterbihtáid. Dál doalvu son sámegielat Pippi máilbmái. Elle Sofes lea dánsejeaddjiduogáš, ja nu lea maiddái Marte Fjellheim Sarres guhte neaktá Pippi.

– Dan gal mii fuobmát dakkaviđe go máilmmi gievrramus nieiddaš ihtá lávdái.  Mun dieđusge liikon hui olu lihkadit, ja dán bihtás gal neavttárat besset lihkadit olu, dadjá Elle Sofe.

Bagadalli sihke balus ja ilus

Pippi-buvttademiin bargagohte borgemánus. Elle Sofe lei sihku balus ja ilus, go dát lea su vuosttaš teáhterbagadanbargu. 

– Mun han ledjen guhká juo diehtán ahte galggan teáhtera bagadallat vuosttaš geardde, ja ledjen maid illudan dasa. Go de álggiimet, dovdagohten veahá balus, jurddašin “mo dát ges galgá mannat, Elle, maid don dál leat vuohon fuobmán”.  Muhto dál go mii leat bargan oanehaš de dovddan ahte máhtán dán barggu, ja ahte ovttasbargu neavttáriiguin manná bures. Lean hui duhtavaš, dadjá Elle Sofe, gii illuda vuosttaščájálmassii.

– Somá bargat Pippin

Elle Sofe lea leamaš bagadallanveahkkin eará bihtáide ja de beasai ge vásihit movt giehtačállosa heiveha lávdái, dat mii su mielas lei stuorimus hástalussan bagadallanbarggus.

– Mun jurddašin olu daid scenaid birra, ahte mo daid galggan čoavdit.  Dat lea vissa álo nu ahte lea mihá buoret álgit, ja oaidnit fysihkalaččat mo lea, go dalle oažžu ideaid ja jurdagiid mo ovtta scena sáhttá dahkat. Hui somá oaidnit mo dat mii álggus dušše čuožžu báhpiris, ealáska ja šaddá juoga hui miellagiddevaš. Dego dakkár mánná gii stuorrula, dadjá Elle Sofe gii dál lea hui duhtavaš iežas bargguin ja movt son lea čoavdán daid iešguđetge scenaid bihttás. 

Neavttárat leat Marte Fjellheim Sarre, Anja Bongo Bjørnstad, Sarakka Gaup, Anitta Suikkari, Iŋgor Ántte Áilu Gaup, Egil Keskitalo, Nils Henrik Buljo ja Mary Sarre.

Go Pippi lea guoimmuhan Guovdageainnus, de boahtá ges Kárášjohkii gaskavahku 10.10 ovdalgo dolle mátkái. Loga  www.beaivvas.no goas Pippi boahtá du báikái.