pressebilde
preassagovva

Ođđa oasseváldi olahus

Lea hirbmat stuora beroštupmi searvat NM čáhcecrossii, čállá Guovdageainnu mohtorsearvi preassadieđáhusastis.

Dássážii leat oktiibuot 85:s dieđihan NM vuodjimiidda mii lágiduvvo Guovdageainnus dán vahkkoloahpa. Dasto leat dát vuodjimat okta daid stuorámusaid searvvis davvi riikkain. Nu čállá Guovdageainnu mohtorsearvi preassadieđáhusastis.

- Mii lea diehttelasat hui movttegat ja duhtavačča. Eat lean oba vuordan ge ná ollosiid dáhttut searvat. Lea olahus ja lea oba máŋga jagi áigi go lei lahkage dákkár oasseváldi lohku, lohká Guovdageainnu mohtorsearvvi jođiheaddji Johan Mathis Gaup.

Beakkálmasat bohtet

Beakkáneamos norgalaš vuoddjit Joachim Olsen, Morten Blien ja Niillas Jovnna Länsman bohtet. Dasa lassin leat eará ge stuora namat oasseváldilisttas ja erenomáš olu vuoddjit Suomas bohtet.  

– Bána lea jorbalágan lávvardaga, ja sotnabeaivvi ges lea drag-vuodjimat njulges bánas. Goappašat bánas sáhttá vuoitit NM namahusa ja buot viđa luohkáin Dasa lassin lea juohkehaččas geas miella geahččalit vuodjit vejolaš dan dahkat sotnabeaivvi. Šaddá maid gelddolaš showa bottus, lohká Gaup.  

Afterdrag

Manne nu ollosat dáhttut searvat dán jagi, jáhkká Gaup leat danne go leat bures márkanfievrridan gilvvuid ja dasa lassin lokten váldovuoittuid 10 000 ruvdnui.

– Dasa lassin mii leat áidna almmolaš čáhcedrag lágideaddji olles Norggas, lohká Gaup.

Eahkedis šaddá “afterdrag” ja vuoitoseremoniija Alfreds Kroas. Doppe guoimmuhit Jovsset Biera Buljo ja AKA Čezá geas lea vel Jan Ole Hermansen guosseartistan.