Marie Louise Somby govven
Preassagovva: Marie Louise Somby

Oažžu Sámi Ráđi bargostipeandda

Sámiráđi kulturlávdegoddi leat dál juolludan kulturdoarjagiid ja bargostipeanddaid 2019 ovddas. Golbma áigeguovdilis dáiddárat; Máret Ánne Sara, Akkil ja Sara Ajnnak, ožžo Sámiráđis bargostipeandda doarjjan sin dáiddalaš bargguide.

Sámiráđđi juohká jahkásaččat ruhtadoarjagiid sámi kulturdoaimmaide ja lea áidna rájakeahtes ruhtadanvuogádat gos sámi dáiddárat ja kulturbargin lea seamma vejolašvuohta ohcat vaikko gos Sámis leat eret. Kulturdoarjaga ulbmil lea nannet sihke árbevirolaš ja ođđaáigásaš sámi kultuvrra ja dáidaga, ja doarjja vuoruha earenoamážit prošeavttaid mat dihtomielalaččat barget olles Sámi perspektiivvas. 

Čakčat sáhtte ge sámi dáiddárat ja kulturbargit miehtá Sámi ohcat kulturdoarjagiid 2019 doaimmaide. Sámiráđđi oaččui 67 prošeaktadoarjjaohcamuša ja 16 bargostipeandaohcamuša oktiibuot 6.000.000 NOK ovddas.

– Ledje dán jagi maid olu buorit ohcamat miehtá Sámis ja vuoruheapmi lea álo váttis. Lei dán jagi maid earenoamáš gealdu oaidnit bohtet go seamma olu ohcamat go lávejit dál go leimmet sirdán áigemeari juovlamánus čakčii muhto eai lean stuora erohusat ohcanlogus, dadjá Lill Tove Fredriksen, guhte lea Sámiráđi kulturlávdegotti jođiheaddji preassadieđáhusas.

 

– Bargostipeanda dehálaš doarjja sámi kulturbargiide

Kulturlávdegoddi juolludii 41 prošeavttaide oktiibuot 1.200.000 NOK. Dasa lassin ožžo golbma áigeguovdilis kulturbargit 200 000 NOK bargostipeandan guhtege. Sii leat Máret Ánne Sara, Akkil ja Sara Ajnnak. Fredriksen dadjá lei alla dássi kulturbargiin geat ledje ohcan bargostipeandda Sámiráđis.

– Sámiráđi bargostipeanda lea dehálaš doarjja min kulturbargiide. Dán jagi mii leat juolludan bargostipeandda golbma kulturbargiide geat buohkat leat hui áigeguovdilis dáiddárat Sámis, dadjá kulturlávdegotti jođiheaddji, Lill Tove Fredriksen.