Govvamontáša: Nils Egil Gaup

Nuorat čájehit ovddasvástádusa

Riikkaidgaskasaš #metoo kampánnja šloavggehii dego dolla goikesuoinnis ja šluvgilii olles máilmmi.

Ollu oranisašuvnnat ja fitnodagat váldde ášši hui duođalaččat ja ásahedje ođđa bargonjuolggadusaid ja iskkadeamit čađahuvvojedje bargosajiin. Bohtosat suorggahedje eatnašiid. Dáide ollugat morihit dan olis?

Kampánnjas ledje máŋggalágan váikkuhusat, sihke buorit ja heajut ja jus daid galggaš logahallat, de jávkkeha dasa olles beaivi. Ollislaš govva goittot lea, ahte dat dagahii juoidá olles máilmmiin, go seksuálalaš vealaheapmi oaččui ođđalágan stáhtusa.

Noereh-nuoraidorganišuvdna lea maiddái váldán oasi ovddasvástádusas, go leat ásahan ođđa fáddágilkora, #sapmitoo, mii lea #metoo vuođul ráhkaduvvon, muhto guoská dušše fal Sápmái. Organisašuvdna oaivvildage váttisvuođa dárbbašit čalmmustuhttit maiddái Sámis, gos lea stuorra jávohisvuođakultuvra, mii lea dagahan ja ain dagaha unohisvuođa.

Danin Noereh stivralahttu Jenny-Krihke Bendiksen almmustahtii lohkkiidreivve bivnnuhis Nordlys-áviissa Nordnorsk Debatt -siiddus njukčamánu 8. beaivvi. Nugo mun lean ádden ja vuohttán, de lea dát, siidu gos olbmot viššalit kommenterejit čállosiid. Dán čállosa ii leat dattege oktage kommenteren. Manin nuges? Deaivvaigo beare bures, vuoi eaigo olbmot oainne duođalašvuođa áššis? Vuoi leago juoga masa mii beare leat “hárjánan”, eatge mii gille hállat dan birra?

Duostilis nuorat dahket dan maid earet eará njunuš sámepolitihkkárat ja stuorra organisašuvnnat livčče galgan čuovvulit dalle go #metoo beakkehii. Mun geahččalan muitit maid Sámi stuorámus ásahus dagai ášši oktavuođas, muhto ii leat darvánan muitui. Go dárkkistan jođánit google vehkiin de vuosttaš ášši mii ihtá lea NRK Sámi ášši, mii lea čállon ođđajagimánus dán jagi, mas Sámediggi rievdadii ehtalaš njuolggadusaid, muhto eai politihkárat diehtán ahte sivvan lei unohis  seksuálalaš láhtten muhtin nissona vuostá.

Ja njunušpolitihkkarat, geat dihte áššis, dovddastit iežaset leamaš beare njoammelhiitamat. Seamma áššis boahtá maiddái ovdan ahte oktiibuot 10 nissona leat vásihan unohis seksuálalaš láhttema Sámedikkis. Šaddá gelddolaš oaidnit nagodago ođđa kampánnja oažžut min servodaga ságastallat rahpaseappot váttisvuođas, mii čihkosis lea beassan ealašit dássážii.

Emneord: 
Tags: