FOTO: KSENIA NOVIKOVA / NRK

Morten Ruud muitun (1961-2018)

Čálli: NRK Sámi direktevra Mona Solbakk

Min Morten lean guođđán min. Lávvardaga suoidnemánu 21. b. eahkeda beaggigođii jáhkkemeahttun sáhka, ahte Morten Ruud lei duššan helikopterlihkohisvuođas. Morten gii lei nu ealli, nu ealás. Son šattai hui lagaš máŋgasiidda, sihke bargo- ja eará oktavuođain. Nu lei Morten. Liekkus, olmmošeaddjái ja utnolaš. Almmái gii oinnii buohkaid, beroštii ja guldalii. Nu lei son journalistan ja hoavdan ge. 

Fargga 30 jagi dassái oahpásmuvven Morteniin, loahpageahčen 80-logus go barggai Davvi Medias. Moadde jagi maŋŋelaš deaivvadeimme ođđa bargosajis, NRK Sámis, dalá NRK Sámi Rádios. Morten Ruud lei ollu jagiid min riikkaviidosaš sámi jietna, go doaimmahii min vahkkosaš Rapport fra Sameland -sáddaga. Erenoamáš vuogas rádiojienain muitalii deháleamos ságaid Sámis. 

Morten lei sámi journalista ja redaktevra, gii gearggai bargat máŋgga sámi ja norgga medias, nugo Ságahis, Finnmark Dagbladas, NRK Sámis, NRK Moskva-korrespondeantan ja NRK Finnmárkkus - maŋemuš vihtta jagi guovlluredaktevran. 

Sámi áššit ja journalistihkka ledje Mortena váimmu lahka. Maŋŋá go son jođihišgođii NRK Finnmárkku 2013:s, de leat sámi áššit leamaš guovddážis ja lunddolaš oassin sin doaimmas. Moai máŋgii ságasteimme man dehálaš lea ahte eai dušše sámi mediat gozit ja čuvget sámi áššiid. Ja moai leimme nu rámis go dál leat máŋga sápmelačča redaktevran NRK:s, ii dušše NRK Sámis. Son lei okta dain.  Ja su jođihemiin vuhtiimet bures man stuorra erohusa dahká go lea sápmelaš redaktevra. Su áiggis lea NRK Finnmárku čehpet ovddidan ja čuvgen sámi áššiid, seamma lunddolaččat go eará áššiid ge. 

Morten Ruud lei rájáid rasttildeaddji máŋgga dáfus. Son gulahalai bures olbmuiguin, beroškeahttá riikka, čearddalaš, kultuvrralaš ja media rájáin. Morten lei máŋggagielat, ja hálai sihke ruošša-, sámi-, dáro- ja eaŋgalasgiela. Sus lei duohta dáhttu ahte mii galggaimet gulahallat, áddehallet ja ovttasbargat, ja nu buohkaide addit sáni saji. Son lei earret eará guovddážis Barents Press -fierpmádagas mii čohkke Norgga, Suoma, Ruoŧa ja Ruošša journalisttaid. Son lei ealljáris olmmoš ja ovdánahtii ovttasbargguid sihke NRK siskkabealde nugo NRK Sámiin, Finnmárkku mediaiguin,  Suoma Ylein ja Ruoŧa SVT davimus guovllukantuvrraiguin.

Dál lea min movttiidahtti ja ealljáris Morten guođđán min.    

Sápmi mii sáhttá vásihuvvot viiddisin ja stuorisin, orru dál nu uhcci ja rašši. Davvi-Norga, Barentsguovlu ja Sápmi lea massán erenoamáš rájáidrasttildeaddji ovdavázzi. 

Min jurdagat mannet su niidii, Rakelii, moarsái Lindai, vánhemiidda ja muđui su bearrašii.

Mii gudnejahttit Morten Ruud nanu barggu ja leat giitevačča go beasaimet vásihit su ustitvuođa. 

Vuoiŋŋat ráfis, ráhkis sámi viellja. Oaidnaleapmái