Min vuoigatvuođat: Sámi eana sámiide!

Dán SÁMi ođasmagasiinnas deaivvadat Maja Kristine Jåmain. Son lea bajásšaddan Fosenis Trøndelágas. Su bearaš lea boazodilis ja Maja Kristine sávvá iežas muhtun čáppa beaivvi váldit badjelasas bearraša boazodoalu. Váldit badjelasas bearraša doalu ii buvtte beare buori, go stuora bieggafápmorusttegat áitet boazodoalu. Sin guohtuneatnamat eai leat šat anihahtti, jus fal bieggamilluid ceggejit Fovsena guvlui.

Boazodoalloguovlluide bahkkejit eanet ja eanet doaimmat jagis jahkái. Sihke máddin ja davvin boazodoallit rahčet juohke ain áidna beaivvi vierrásiid doaimmaid geažil. Maja Kristine Jåma ja eará nuorra boazodolliid boahtteáigi lea duođaid áitojuvvon, go lea álkes bargu ákkastallat manne lea dehálaš buvttadit lunddolaš energiija.

Mii ipmirdat buohkat ahte energiija buvttadeapmi lea dehálaš, muhto mii dáhttut seamma ipmárdusa eiseválddis ja sisabahkkejeddjiin. Maiddái sápmelaččaid eallinvuohki lea dehálaš. Boazodoallu lea okta sámi vuođđoealáhusain. Boazodoallu lea dehálaš kulturguoddi ja obanassiige dehálaš Sámi eallinvuođđu. Jus jávistišgohtet boazodoalu, de leat nuppi lávkki juo lávken sámi kultuvrra sihkastan nammii.

Dieđán ieš hui bures man birra dás lea sáhka. Mu viellja lea áiddo váldán badjelasas bearraša doalu. Bávččaga, oainnán sin medias ja sosiálamediain muitaleamen movt sii jiehtanasaid vigget caggat buktimis bieggamilluid Lágesduoddarii. Lea surgat oaidnit movt Maja Kristine, mu vielja ja eará boazodolliid vigget duvdilit eret bieggamiellapárkkaid ovddas.

Dákkár sisabahkkemat muittuhit veahá boraspiredigaštallama. Oslos suhttet rivgut ja dáččat go boazosápmelaš ja sávzaboanda dáhttu spirelogu geahpedit. Sii dáhttot daid bisuhit ja velá laskat, muhto eai varra fuolaše daid Oslo gáhtaide. Justa dakkár dovdu lea dál ge. Sii sihtet lunddolaš energiija mii ii nuoskkit dego olju, muhto bieggamilluid eai varra fuolaše ránnján, duvdet baicce min ala. Dáppe eai dárbbaš ieža oaidnit romes jiehtanasmilluid. Várra oaivvildit dáppe eai leat beare gallis ja gii hal duoddariid vánddarda dán áigge.

Gal mii eat ábut diktit sisabahkkejeddjiid lonistit min kultuvrra ja eallima moatti miljovnna ruvnnu buhtadusain. Sámit, geain vissa lea buoremus dilli ja resurssat buot eamiálbmogiid gaskkas, fertejit bargat buorrin ovdagovvan earáide.

Lea oba lihkku go mis lea buorre veahkki Sámedikkis. Sámediggi lohká boazosápmelaččaid doarjut ja veahkehit lossa sisabahkkenáššiin, ja ráhkkanahttet áššiid veahkkin ja dorjot ruđalaččatge jus válljejit riektevuogádagas sisabahkkejeddjiid vuostá doarrut. Lea oba lihkku go mis lea sorjjaskeahtes riektevuogádat Norggas, ja lea oba lihkku go gávdno riektevuogádat Haagas, mii sáhttá Norgga riektevuogádaga mearrádusaid hilgut, jus fal eai leat leamaš rehálaččat duomuin.

Sámiin leat vuoigatvuođat. Sámi eana sámiide!

 

 

Emneord: