Mii – Gos – Goas? 31.08 - 07.09

SÁMi ođasmagasiidna muitala juohke háve juoidá, mii ovddos guvlui dáhpáhuvvá Sámis! Bures boahtin min “Mii – Gos – Goas?” spáltii!

ČÁJÁHUS

01.09 dii. 15-18:00 Hans Ragnar Mathisen čájáhusrahpan

Keviselie/ Elle- Hánsa / Hans Ragnar Mathisena litografiijat ja muorravadjosat áigodagas 1973 - 2006 čájehuvvojit Oslo Sámi Viesus. RiddoDuottarMuseat dat lea luoikan čájáhusa Oslo Sámi Vissui. Čájáhusa muhtin dáidagat leat oastin láhkai. Elle-Hánsa lea ieš mielde čájáhusrahpamis.

06.09 dii 18-20:00 Áigemátki-čájáhus Sámi Dáiddaguovddážis, Kárášjogas

Čájáhusa rahpá direktevra Kristoffer Dolmen

Dáiddalaš ovdanbuktin

Guossoheapmi

Dáiddárat: Victoria Andersson, Tomas Colbengtson, Eva Delving-Wiklund, Monica Edmondson, Bente Geving, Annelise Josefsen, Per Isak Juuso, Inger Blix Kvammen, Britta Marakatt Labba, Mathis Nango, Hege Annestad Nilsen, Hilde Skancke Pedersen, Synnøve Persen, Outi Pieski, Gjert Rognli, Maret Anne Sara, Odd Marakatt Sivertsen, Lena Stenberg, Anders Sunna, Liselotte Wajstedt. 

Sámi Dáiddačehpiid Searvi (SDS) lea válljen dáidagiid ja buvttadan organisašuvnna ávvučájáhusa Sámi 100-jagi ávvudeapmái 2017 .

 

ČÁJÁLMAS

01.09 dii 12:30-14:30 boahtá Staaloe Oslo Sámi vissui  

Stállu lea guovddáš sámi muitalusárbevierus. Dat ovddasta olmmošlaš geahnohisvuođaid ja stállomuitalusaid bokte mánát ohppet gieđahallat dakkár hástalusaid. Stállu ovddasta máilmmi váralaš fámuid, seammásgo dat ovddasta “daid earáid”, geat eai ipmir ja dovdda sámi luonddu ja árbevieruid.

Čájálmas lea dárogillii, muhto geavahuvvojit maid sámi sánit ja dadjanvuogit. Buohkat leat bures-

boahtin, muhto bihttá lea heivehuvvon mánáide, geat leat deavdán 4 jagi. Unnit mánáid ovddas fertejit váhnemat ieža árvvoštallat sáhttet go 

geahččat čájálmasa

Staaloe-čájálmasa leat máttasámi girjebusse Gærjah ja Åarjelhsaemien Teatere AS hábmen ovttas.

Diibmu 12.30 rájes sáhtát bileahtaid oastit Sámi viesus. Teáhterbihttá álgá dii 12.30 ja bistá diibmobeale.  

 

MUSIHKKA

02.09 dii 15-16:30 Vuelie - Frode Fjellheim, Tove Ramlo-Ystad ja 180 koarralávlu Alta Nordlys katedralas.

Dán konsearttas beasat vásihit čuojaheaddji ja šuokŋadahkki Frode Fjellheim ovttas 180 koarralávluin, geaid Tove Ramlo-Ystad jođiha. Frode kultuvrralaš duogáš ja sámi musihkka leat rahpan áibbas ođđa musihkkamáilmmi koaraide, ja viiddidan sin repertoára mealgat.

Dán konsearttas beasat vásihit ovcci koara Tromssas ja Finnmárkkus:

Allsang Alta, Alta Kammerkor, Alta Mannskor, Alta Motettkor, Alta Vocale, Dyrøy korforening, Hammerfest Damekor, Kåfjordkoret ja Mollis. 

Máŋgga koaras leat iežaset sierra lávlagat maid konsearttas. 

Bileahtaid fitnet oastit TicketCo 

 

RABAS BEAIVI

02.09 dii 11-14:00 Joatkka duottarstobus - turistasearvi ávvuda 150 jagi

Sotnabeaivve lea riikasaš Vuolgge-olggos-beaivi ja dalle bovde Den Norske Turistforening, mii ávvuda 150 jagi, buohkaid Joatkka duottarstohpui.

Joatkka duottarstobus lágiduvvojit iešguđetlágan bearašdoaimmat: kánoin meallun, luonddubálgá vázzin, oaggun, murjen, dolastallan ja Lisa guossoha biđđosa. Duottarstobus maid vuvdet váffelgáhkuid, gáfe ja eará. Lisa biđus lea nuvttá Barnas Turlag ja Turistforening miellahtuide. 

Sii geat háliidit fárrolagaid earáiguin vázzot ja sii geat eai leat oahppásat guovllus sáhttet boahtit Tutteberget bisánansadjái dii 11 ja vázzit Joatkka duottarstohpui Maria Øieniin, gii searvá Barnas Turlag ovddasteaddjin. Bisánansadji lea Stillaveiena maŋimuš bumma buohta. Lea sullii 4 km vázzit. 

Lisa ja earát Joatkka duottarstobus vižžet du gálvvu gaskkal 10.45 ja 11.00 vai dan it dárbbat guoddit. Sii geat dárbbašit sáhtu besset fatnasa mielde Joatkka duottarstohpui.