Preassagovat

Mii? Gos? Goas? 22.12 - 05.01

SÁMi magasiidna muitala juohke háve juoidá, mii ovddos guvlui dáhpáhuvvá Sámis! Bures boahtin min “Mii? Gos? Goas!” spáltii!

SÁMI DEAIVVADEAPMI

Álttá Sami siida lágida sámi deaivvadeami nuppi juovlabeaivve. Go viimmat leat geargan juovlahušain ja vuoiŋŋastan bures, de lea sihkkarit suohtas vuolgit juovladeaivvadeapmái, mii lágiduvvo juovlamánu 26. b. dii 12:00 - 16:00 Álttá Sami Siiddas.

Dát lea vuosttaš juovladeaivvadeapmi, ja soaitá šaddat vel dáhpin. Boazo Sami Siida lea rabas buohkaide nuppi juovlabeaivve. Ja amamet dárbbašit vuos málestišgoahtit basiid áigge, de vuvdet doaluid áigge biđđosa. Bohccot maid servet doaluide, ja dat geat háliidit besset vuodjit herggiiguin. Boahtágoson juovlanigá maid? Várre fal saji johtilit, vai sihkkarit beasat mielde.

BASÁRA JUOVLLAID JA OĐĐAJAGI GASKKAS

Nu mo dáhpin jo lea šaddan, de lágidit basára juovllaid ja ođđajagi gaskkas sihke Guovdageainnus, juovlamánu 29.-30. b. ja Kárášjogas, juovlamánu 28.-29. b. Valáštallansearvvit Kautokeino IL ja IL Nordlys dat lágidit doaluid, main lea gáffádat ja vuorbádit fiinna vuoittuid.

Kárášjogas:

Doalut leat valáštallanhállas duorastaga 28.12 ja bearjadaga 29.12 d.17:00-23:00 goappašii beivviin. 

Guovdageainnus:

Báktehárjjis

Bearjadaga 29.12.17 dii 15.00 - 22.00
Lávvardaga 30.12.17 dii 15.00 - 21.00.
Vuorbádeapmi álgá dii 21.00

MUSIHKKA

Juovlamánu 29. b. lea Ivnniiguin-konsearta Alfreds Kros, Guovdageainnus, diibmu 23:00-01:30. Dalle ávvudit ođđa CD, “Ánte” almmustahttima. Beasat gullat boares bivnnuhemiid ja ođđa lávlagiid ođđa CD:s. Joavku áigu «rocket basiid gaskkas»!

Juovlamánu 31. b. čuojaha Nicko Buljo & band Alfreds kros 21:00-03:00.

Dán jagi, dego diibmáge, beasat de boahtit ođđajagekonsertii ja guldalit Nicko Buljo & band musihka. Orru hui buorre vuohki ávvudit ođđa jagi boahtima.

KULTURBÁJIT

Ođđajagemánu 5. b. lágiduvvo Kárášjogas nuoraid kulturbádjevahkkoloahppa!

Ođđajagemánu vuosttaš vahkkoloahpa boahtá oainnat Finnmárkku nuoraid resursajoavku (URG) Finnmárkui ja Kárášjohkii lágidit kulturbájiid.

URG lágida dáid bargobájiid:
Oahpa čuojahit čuojanasa.

Media ja sosiála mediat Nuoraid kulturdeaivvadeami (UKM) oktavuođas

Mo beassat lávdebalus 1-2-3.
Doaluid láidesteddjiid bádji.
UA bádji «Mo lágidit nuoraid kulturdeaivvadeami (UKM) mu báikkis».

Bájit lágiduvvojit Kárášjoga mánáidskuvllas ja kulturskuvllas ja dat geat háliidit ijastallat sáhttet dahkat dan skuvllas, olles vahkkoloahpa!
Ahkeráddjehus 12-20 jagi!

VALÁŠTALLAN

Rørlegger Kåvena ustitčiekčamat lágiduvvojit juovlamánu 29. b. Leavnnjas. Čiekčamiidda bovdejit buohkaid, geat leat riegádan 2002 dahje ovdal, sihke nissoniid ja albmáid. Čievččatgo klubbas vai fitnodatjoavkkus, vai it goappásge - dat ii mearkkaš maidege. Dáppe it dárbbaš makkárge miellahtu itge liseanssa.

PIL lágida gáffádaga hállas nu ahte čiekčamiid áigge sáhtát oastit biepmu ja juhkamuša. Sihke nissoniid ja albmáid luohkás addojuvvo vuoitu čeahpimus jovkui.

 

 

 

Emneord: