Mii – Gos – Goas? 20.07-27.07

SÁMI ođasmagasiidna muitala juohke háve juoidá, mii ovddos guvlui dáhpáhuvvá Sámis! Bures boahtin min “Mii – Gos – Goas?” spáltii!

MUSIHKKA

25.07 dii 19-21:30 Anárvahkus beasat vásihit Gájanasa ja Soljju nástti.

Solju lea joavku, mas eadni Ulla Pirttijärvi ja su nieida Hildá Länsman sihke hábmejit dialoga árbevirolaš ja ođđaáigásaš sápmelaš kultuvrra gaskii ja huksejit oktavuođa eurohpalaš iskkadeaddji pop-musihkkii.  Lávddi ala Ullain ja Hildáin gorgŋejit máŋggačuojanasdáiddár, perkussionista Teho Majamäki ja HIM-joavkkus oahpes keyboard-čuojaheaddji Janne Burton Puurtinen.

Gájanas leages máŋggakultuvrralaš musihkkajoavku mii deattuha eamiálbmoga ja luonddu gievrras ja nana oktavuođa. Sámi kultuvrra lassin lea olles máilbmi Gájanasa inspirašuvdna. Juoigi-lávlu Hildá Länsman lea ohcejohkalaš. Basista čuojaheaddji Erkki Feodoroff lea nuortasápmelaš Anáris eret. Rumbučuojaheaddji Kevin Francett ja gitarista Nicholas Francett leaba vieljažat geain leaba ruohttasat máŋgga sajis, sihke Anáris, Ålánddas ja Amerihkás.

Konseartta botta beassat oaidnit Arttu Nieminena čuovga- ja govvašovva.

Doalut leat Sajosis Anáris.

VAIKKO MII

26-29.07 Gussanjárgga beaivvit

Gussanjárggadoalut leat sihke mánáide ja ollesolbmuide. Doppe lea sihke reabbábivddu MM ja čájálmas viessohoaiddár Kai Killain, gii lea dovddusin šaddan Pelle Politiijabiilla ráidduin ja Banana Airlands joavkkuin. Doaluide leat dánge jagi bovden Finnmárku artisttaid ja logaldalliid. Dán jagi beasat earet eará guldalit Kevin Boine, Cleareye aka Charlotte Johansen, AlexP ja máŋgasa eará.

Hui beakkán gilvu Bit for bit lágiduvvo lávvardaga Iselinain. Oasseváldit gilvvohallet lávlumis ja vuoiti gudnejahttojuvvo gitta boahtte jagi doaluide.

Brennende minner -filbma, mii rámiduvvui Tromssa riikkaidgaskasaš filbmafestiválas, čájehuvvo maiddái. Filbma lea Finnmárkku ja Davvi-Tromssa eváhko ja soahtemánáid dili birra. Filmmas deaivat guhtta olbmo, geat šadde báhtarit iežaset riikkas jagi 1944. Filbma čájehuvvo lávvardaga. Bagadalli Ellen-Astri Lundby láidesta filbmii ja searvá ságastallamii filmma maŋŋá.

Čájáhus Noaiddi árbi -  Johan Martin Kaaven  čájehuvvo maid Gussanjárgga doaluin. RiddoDuottarMusea lea noaiddi birra hábmen čájáhusa čuođi jagi maŋŋel go jámii. Čájáhus lea rabas duorastagas lávvardahkii.

ČÁJÁHUS

20.07 dii 09-18:00 Standing Rockas Sápmái.

Govvideaddji Adam Alexander Johansson muitala govaidisguin Standing Rock eamiálbmot akšuvnnas. Davvi Dakotas son lea oaidnán korrupšuvnna, rasismma, bolesiid veahkaválddálašvuođa ja vásihan mo fitnodat, mas skandinávialaččat leat mieleaiggádin, dinesta miljovnnaid seammás go rihkku sihke amerihká lágaid ja olmmošvuoigatvuođaid.

Čájáhus lea Ájtte museas gitta borgemánu 31. beaivái.

VALÁŠTALLAN

21-22.07 dii.11-14:00 Polaris Grand Prix

Áiggutgo liekkadit dán jagi sihkkeldáhpáhussii, Arctic Race of Norway? Dalle heive bures searvat Sirpmá jahkásaš sihkkelastimii, mii heive buot dásiid sihkkelastiide.  

Lávvardaga, suoidnemánu 21. beaivvi: 
- Dii 11 rájes: tempogilvvut 10 jahkásaččaide ja boarrásabbuide.

- Dii. 13.30 gáhtasihkkelastin mánáide 
- 14.00 gáhtasihkkelastin 10 jahkásaččaide ja boarrásabbuide

Sotnabeaivve suoidnemánu 22. beaivvi: 
- Gaskkal diibmu 9 ja 10.30 lea vuolgga lustasihkkelastiide.

- Diibmu 11 lea oktasaš vuolgga

Dieđiheapmi:  www.eqtiming.com ovdal suoidnemánu 17. beaivvi dii 23.59. 

Doalut gullet Barents Cycling Cupii (BCC). Eará BCC-sihkkelastimat leat leamaš Apatitys, Ruoššas ja Luostos, Suomas. 

Eanet dieđut: www.sirbma.no