Preassagovat

Mii – Gos – Goas? 15.06-22.06

SÁMi ođasmagasiidna muitala juohke háve juoidá, mii ovddos guvlui dáhpáhuvvá Sámis! Bures boahtin min “Mii – Gos – Goas?” spáltii!

SEMINÁRA

Sámi kulturvuođđu, luossa ja industriijaovdáneapmi

16.06 dii. 15-19:00 mearrasámi gealboguovddážis Siskkit Billávuonas.

Industriija ovdáneapmi váikkuha Sámi kultuvrii – muhto mo? Semináras gaskkustit dieđuid máŋgga dutkanprošeavttas, maid váldun lea šaddadeapmi, álgoálbmogat, mearraguolásteapmi ja sámi kulturvuođđu obbalaččat. Seminára lágiduvvo ovttasbarggus UiT-Norgga Árktalaš Universitehtain, Sámi dutkamiid guovddážiin.

Fáddáraportta almmuheapmi: Veahkaválddálašvuohta ja vealaheapmi sámi servodagas.

22.06 dii. 11-14:00 Tromssa universiteahtas

Iskkadeapmi čájeha ahte nu ollugat go 49 % sámi nissoniin Norggas leat vásihan veahkaválddálašvuođa dahje vealaheami, muhto vuogádaga heajos doaibmama geažil sii eai soaitte oažžut dárbbašlaš veahki.

Norgga olmmošvuoigatvuođaid nationála institušuvdna (NIM) lea ráhkadan fáddáraportta veahkaválddálašvuođa birra sámi servodagas. Raporttas leat ávžžuhusat mo stáhta buorebut sáhtášii gáhttet dakkár sápmelaččaid olmmošvuoigatvuođaid, geat leat vásihan veahkaválddálašvuođa.

NIM ovdanbuktá raportta váldobohtosiid lunšasemináras Tromssas.

Prográmma:

Geahppa beaiveborramuš

1. oassi: Bures boahtima sávvá direktevra Petter Wille NIM

Sáhkavuorut: Sámediggepresideanta Aili Keskitalo, vuosttašamanuensa Astrid Eriksen, UiT/OsloMet ja journalista Kenneth Hætta.
2. oassi: Fáddáraportta ovdanbuktá seniorráđđeaddi Stine Langlete, NIM

Panelaságastallamii servet sámediggepresideanta Aili Keskitalo, dásseárvo- ja vealahanáittardeaddji Hanne Bjurstrøm, SÁNAG` jođiheaddji Gunn Heatta, Noereh-nuoraidorganisašuvnna jođiheaddji Dávvet Bruun-Solbakk ja Árran julevsámeguovddáža jođiheaddji Lars Magne Andreassen.

3. oassi: Geaidnu viidáset
Dáiddalaš loaiddasteapmi.

Seminára tulkojuvvo dárogiela ja davvisámegiela gaskka. Seminára lea rabas buohkaide, iige dárbbaš dieđihit ovddalgihtii.

ČÁJÁLMAS

Áillohaččat luohti ja poesiija

Heddabeaivvit: Áillohaš ja Beaivváš Sámi Nationálateáhter.

16.06 dii.16.30-18.30 Norske Teateris Oslos.

Čájálmasas beasat áidnalunddot vugiin oahpásmuvvat sámi multidáiddár Áillohačča divttaiguin, musihkain ja filosofiijain. Su teavsttaid váldun lei ráhkisvuohta, ja ráhkistandáidu lei su mielas olbmo váldoiešvuohta. Dan bokte olahit gudnejahttima ja iežas gudnejahttima. Ferte oahppat ráhkistit, maiddái iežas, vai sáhttá ráhkistit earáid.

Bagadallan: Rolf Degerlund. Neavttárat: Egil Keskitalo, Nils Henrik Buljo, Áilloš, Mary Sarre. Musihkkarat: Roger Ludvigsen, Patrick Shaw Iversen
Čájálmas lea dáro- ja sámegillii.

Elin Kåven loaiddasta

22.06 dii 20-01:00 Leavnnja Antikstores

Johan Kaavena 100 jagi čalmmustahttima oktavuođas lágidit Porsáŋggus eahkeda, mas Elin Kåven loaiddasta. Doaluid lágidit Antikstore ja Sámi giella- ja kulturguovddáš.

DEARVVAŠVUOHTA

Sávri ja gievra

18.06 dii 19-19:55 Les-viesus, Guovdageainnus.

Boađe hárjehallat givrodaga ja boaldit buoiddi. Hárjehallan heive sihke dutnje gii it leat hárjehallan ovdal, ja dutnje gii leat jo jođus. Ulbmilin lea boaldit buoiddi ja olahit buorebut definerejuvvon ja gievrras rupmaša. Hárjehaddama jođiha persovnnalaš hárjeheaddji, Ingá Márjá Sarre. Ingá Márjjás lea máŋggabealat valáštallanduogáš, ja lea gilvalan alla dásis sihke Bikini Fitnessas ja Taekwondos. 

KURSSAT

JUOIGANKURSA, oahpaheaddjin Áilloš Gaup

19.06-21.06 dii 11-17:00 Oslo Sámeviesus.

Maŋŋebárgga 19.6 dii 11.00-17.00
Gaskavahku 20.6 dii 11.00-17.00
Duorastaga 21.6 dii 11.00-17.00

ÁILLOŠ GAUP lea dovddus juoigi ja neavttár.

Dán kurssas oahpat:
- Manin juoigat, ja mo?
- Luohti johtá dego riekkis, maid dainna oaivvildit?
- Mun juoiggan du, in du birra. Manin, mo?
- Luohti, dovdduid giella.
- Juoigama seahkalas táktašlájat.
- Dábálaš čuojat.
- Jiena geavaheapmi.
- Goas juoiggadeami sáhttá gohčodit luohtin?
- Luohti ja identiteahtta persovnnalaš dásis.

DIEĐIHEAMIT
Sáddes e-poastta: iaagaup@gmail.com

 

Emneord: