Mii – Gos – Goas? 14.09 – 21.09

SÁMI ođasmagasiidna muitala juohke háve juoidá, mii ovddos guvlui dáhpáhuvvá Sámis! Bures boahtin min “Mii – Gos – Goas?” spáltii!

KONFERÁNSA

19-20.09 diibmu 11:00 rájes: Konferánsa gilvineatnamiid, biepmu ja vejolašvuođaid birra.

Dag Jørund Lønning, Helga Pedersen, Klemet Erland Hætta ja Han Sylte bohtet. Jus leat vuollel 35 jagi boaris de oaččut mátkedoarjaga.  

Fáttát: 

- Eanagáhtten, dálkkádatrievdamat ja Davvi-Norgga vejolašvuođat

- Biebmoeana ja ođasteapmi

- Finnmárkku eanandoalu boahtteáigi

- Šibitdoallu

- Ođđa gilvinprošeakta Giehtavuonas

- Smávvaskála buvttadeapmi

- Eanandoallooahppu Finnmárkkus

- Finnmárkku eanandoalu logut

- Manne Vestfold lea ožžon eanagáhttenbálkkašumi?

Konferánsa lea Kárášjoga Scandic hoteallas

 

SEMINÁRA 

20.09 dii. 14-15:30 Mari Boine 

Finnmárkku dutkanbeivviid oktavuođas bovdejuvvojit buohkat Mari Boine ja UiT dutkiid seminárii Álttá UiT:i.

UiT, Norgga árktalaš universitehta nammada UiT 50 jagi ávvujagi oktavuođas Mari Boine gudnedoavttirin. Mari Boine artistaeallin vulggii johtui go son lei studeanta. Son lea leamaš dehálaš jietna mii lea gaskkustan mávssolaš sámi- ja eamiálbmotgažaldagaid, seammás go UiT lea ovdánan oktan máilmmi deháleamos dutkan- ja oahppoinstitušuvdnan, mii bargá sámi áššiiguin.

Mari lávlagat čájehit sámi servodatovdáneami ja son lohká ieš ahte su vuosttaš lávlagat muitalit su bajásšaddama ja servodaga birra. Semináras mii oahpásnuvvat artista Mari Boinein, gii deaivvada dutkiiguin.

Dutkit leat Carola Kleemann, Eva Josefsen ja Odd Mathis Hætta.

 

KONSEARTA

20.09 dii. 20-21:00 Mari Boine: Áddehallatgo?

UiT Norgga árktalaš universitehta deavdá 50 jagi 2018. Universitehta fokus eamiálbmogiidda ja sámi áššiide lea erenoamáš riikkaidgaskasaš dásis. Mari Boine lea olles iežas artistaeallima guovdilastán eamiálbmotperspektiivva ja čalmmustahttán sámi identitehta olles máilbmái. Son nammaduvvo UiT gudnedoavttirin, ja dutkanbeivviin son ovdanbuktá erenoamáš konseartačájálmasa universitehtaávvudeami oktavuođas.

UiT bargit ja studeanttat ožžot bileahtaid hálbbibui. Čájet duođaštusa go oasttát bileahta. 

 

MUSIHKKA – Sámi riemut Oslos

14.09 dii. 20-01:00 Elle Márja Eira IDJA SÁMI CLUB NIGHT Oslo riikkalávddis

ELLE MÁRJÁ lea guovdageaidnulaš artista, filbmabagadalli ja buvttadeaddji. Su musihkas deaivvadit luohti, elektronika ja eamiálbmotmusihkka. Dáidagiinnis bokte son muitala bearraša boazodoalu birra. Su konsearttaid vásihit olbmot dáiddalažžan, poehtalažžan ja politihkalažžan ja Elle Márjá geavaha visuála govaid. Morten Pettersen lea su buvttadeaddji.

Riksscenen/Riikkalávdi rahpasa dii 20:00

Konsearta álgá dii 22:30

Bileahtaid fidnet riksscenen.no neahttasiiddus dahje uvssas. 

 

15.09 dii. 21-00:00 Sámi Grand Prix – Sámi vahkkoloahppa Riikkalávddis (Riksscenen)

Sámi Grand Prix lea stuorámus musihkkadáhpáhus Sámis. Dan oktavuođas boahtá olles lágideapmi Osloi Sámi vahkkoloahpa oktavuođas. Doppe gudnejahttet vuitiid ja dasa lassin beasat vel vásihit guokte ovddeš vuoiti lávdde alde.

Váldolávddis de beasat vásihit Guovdageainnu beassášfestivála dovdduid, go Stein Austrud jođiha olles musihkkajoavkku ja artisttat, geat faskejedje dán jagi gilvvuin 1., 2, ja 3. saji, guoimmuhit.

Sámi Grand Prix lea musihkkagilvu man Sámi Musihkkafestivála lágida Guovdageainnus. Gilvvut lágiduvvojedje vuosttaš geardde 1990:s ja lea leamaš jahkásaš dáhpáhus. Gilvvus lea sihke juoigan- ja lávlunoassi ja dábálaččat servet artisttat sihke Norgga, Ruoŧa ja Suoma bealde ja muhtumin maiddái Ruošša bealde.

 

GIRJJÁLAŠVUOHTA

18.09 dii 12:30-19:00 Sámi girjjálašvuođabeaivvit 2018

Sámedikki girjerájus ovttas sámi girječálliid servviin bovde sámi girjjálašvuođabeivviide Sámedikkis, Kárášjogas čakčamánu 18. ja 19. b. 2018.

Fáddán dán jagáš girjjálašvuođabeivviin lea min árbi boahtteáiggis.