Mii – Gos – Goas? 13.07-20.07

SÁMI ođasmagasiidna muitala juohke háve juoidá, mii ovddos guvlui dáhpáhuvvá Sámis! Bures boahtin min “Mii – Gos – Goas?” spáltii!

ČÁJÁHUS

13.07 dii. 11-17:00 MayArt čájáhus ”Travel in North” Čájáhusbáiki: Tromsø villmarksenter, Straumsveien, Tromsa.

MayArt May-Linn Aaslie lea inspirerejuvvon Davvi-Norgga luonddus ja huksenvugiin.  Guovssahasat, smávva visožat viiddis guovlluin ja bohccot leat motiivvat, maid eanemus geavaha njuohtamiin ja grafihkas.

Golggotmánu 31. beaivve rádjai lea vejolaš fitnat čájáhusas Husky kafea -prográmma oktavuođas. Lea vuovdinčájálmas ja lea maiddái vejolaš diŋgot su grafihkaid.

Dát lea nuvttá fálaldat. 

 

FESTIVÁLA

13-15.07 Lofuohta Piano Festivála

Dán jagi klassihkalaš musihkkariemuin Lofuohtas deaivvadat sihke norgalaš ja olgoriikkalaš musihkkariiguin. Singuin gávnnadat iešguđetge girkuin, main lea buorre akustihkka ja main guldaleaddjit ja artisttat šaddet hui lahkalaga. Musihkkarat dáhttot ovdanbuktit klassihkalaš musihka álbmotlaččat ja humoristtalaš vugiin, muhto seammás diktit guldaleddjiid geaidašuvvat musihkain. Lofuohta erenoamáš fiinna luondu ja čuovga láidestit du návddašit musihkkamáilmmis.

Prográmma: http://lofotenfestival.com/no/hjem/#!/program

19-21.07 Buktafestivála Tromssas

Musihkka, vuolla ja mearrabiebmu leat guovddážis Telegrafbuktas. 

Dán jagi čuojahit earet eará: Bel Canto, Moddi, Sivert Høyem, Sondre Justad, Backstreet Girls, Television.

Gávnnat eambbo dieđuid ja ollislaš prográmma dáppe:  www.bukta.no

20-22.07 Kipparifestivála - Kipparin festivaali.

Kveana festiválas Bissojogas leat fálaldagat sihke mánáide ja ollesolbmuide. 

Earet eará leat doppe spábbačiekčamat, ja konsearttas guoimmuhit Olav Skanken, Amelia Hauger Hoffain ja Olver Hesjevoll. Beasat maid vásihit hášema, stohkosiid ja olu eará doppet. 

Prográmma gávnnat dás: https://www.facebook.com/kipparifestivalen/

 

FEARA MII

12-14.07 Máilmmi stuorámus luohtearkiiva Riddu Riđus

Máilmmi stuorámus luohtearkiiva! Riddu Riđđu-festivála áigge lea Romssa musea – UiT Norgga árktalaš universitehtas Riddu-guolbanis luohtelávvu, mas sáhtát oahpásmuvvat máilmmi stuorámus luohtearkiivvain, mas leat máŋga čuođi luođi. Boađe UiT luohtelávvui  guldalit ja oahpásmuvvat boares luđiiguin. Soaittát maid háliidit searvat arkiivii, ja báddestit luođi dahje fearána.

Guovlal Romssa musea rabas “luohtelávus” mii lea Riddu-siiddas! Lávvoverdde lea Ola Graff.

Rabas bearjadaga dii 14 – 18 ja lávvordaga dii 12 – 16 .

 

SEMINÁRAT

13.07 12-14:00 Seminára gielddasápmelaččaid birra Davviálbmogiid guovddážis, Olmmáivákkis (Riddu Riđu oktavuođas). Gielddasápmelaččaid historjá ja kultuvra leat apmasat oallugiidda, ja dán jagi Sesam-semináras mii jearratge geat gielddasápmelaččat leat - ovdal ja dál. Seminára oassin lea oppalaš geahčastat Guoládatnjárgga sápmelaččaid historjái, ja ságastallan gielddasápmelaččaid dilis odne.

Váldoságadoalli lea Anna Afanasjeva, riikkaidgaskasaš Barentsčállingotti ovddeš eamiálbmotráđđeaddi ja Sámi dutkamiid guovddáža ovddeš ph.d.-stipendiáhtta.

14.07 dii 11-11:50 Mari Boine ja UiT UiT Norgga árktalaš universitehta deavdá 50 jagi 2018. Universitehta fokus eamiálbmogiidda ja sámi áššiide lea erenoamáš riikkaidgaskasaš dásis. Mari Boine lea olles iežas artistaeallima guovdilastán eamiálbmotperspektiivva ja čalmmustahttán sámi identitehta olles máilbmái. Son nammaduvvo UiT gudnedoavttirin, ja Riddu Riđđu festiválas ovdanbuktá son erenoamáš konseartačájálmasa universitehtaávvudeami oktavuođas.

 

VALÁŠTALLAN

20.07 Verddečiekčamat Buvrovuonas

 Jahkásaš verddečiekčamiidda sáhttá dieđihit:

1.     joavku muhtin gilážis 

2.     orohaga dahje siidda joavku 

3.     oktasašjoavku, masa servet moatti gilážis, moatti orohagas/siiddas dahje sihke orohagas/siiddas ja gilážis. Joavkku namma galgá čilget geat joavkkus leat mielde.

Joavkkus sáhttet leat oktiibuot 14 čiekči. 

Dál lea maid veteránaluohkká dievdduide, geat leat badjel 40 jagi ja nissoniidda badjel 35 jagi. Dattege dat ii mearkkaš ahte dan ahkeluohká čiekčit eai sáhte searvat seniorluohkkái, lea baicce fálaldahkan daidda, geat dáhttot veteránaluohkás čiekčat.

Dieđihanáigemearri: 15.07. 2018 

Ahkerádjá: 14 jagi