MII-GOS-GOAS? 12.01-19.01

SÁMi magasiidna muitala juohke háve juoidá, mii ovddos guvlui dáhpáhuvvá Sámis! Bures boahtin min “Mii? Gos? Goas!” spáltii!

TEÁHTER

Ođđajagemánu 12.-15. čájeha Beaivváš čájálmasa Snøfrid Guovdageainnus. Dat lea muitalus ráhkisvuođas, mii sáhttá leat ovdun, muhto sáhttá maid bilidit ollu. Sámenisu Snøfrid náitalii Norgga gonagasain Harald Hårfagrein (Harald I), gii čohkkii Norgga oktan riikan.

Ođđajagemánu 17. ja 18. beaivve seammá čájálmasa beasat oaidnit Kárášjoga valáštallanhállas. Goappáge báikkis diibmu 18:00-19:30.

Stállu ja guovssahasa bárdni čájehuvvo Porsáŋggu giella- ja kulturguovddážis ođđajagemánu 16. b. diibmu 13:00 - 14:00.

Skábmaeatnamis lei issoras garra borga. Eallit ja lottit dopmet ohcat suoji dálkkis. Danin ii fuobmán oktage go hirbmat ilgadis ja soaiggus ealli steamppui Skábmaeatnama duoddariid badjel. Dat lei Stállu.

Čállit: Anstein Mikkelsen, Edit Flåten ja Anja Flåten

Bagadalli: Rolf Degerlund

Neavttár, máinnasta davvisámegillii: Mary Sarre

Heive buoremusat mánáide gaskkal 5 ja 8 jagi.

 

SKUVLA-BIEHTÁR ÁNNE TALKSHOW 

Ođđajagemánu 13. b. dii 16.00

Oslo vuosttaš gielladeaivvadeapmi dán jagi!

Oslo Sámi Viesus beasat vásihit Skuvla-Biehtár Ánne talkshow lávvardaga, ođđajagemánu 13. b. dii 16.00!

Kárášjohkalaš Anna Anita Guttorm lea girječálli ja journalista ja lea bargan 17 jagi NRK Sámi ođasredaktevran, tv-hoavdan ja journalistan, ja ráhkadii earret eará Birjá ja Mirjá slapstick-ráiddu. Dál Guttorm lea áigeguovdil Skuvla-Biehtár Ánne talkshowain, mainna son Elin Margrethe Werslandiin, gean ruohttasat leat Olmmáivákkis, gieskat oasálasttiiga Sámi girjjálašvuođa festiválas Jåhkåmåhkis. Wersland lea oahppan oskkuhistorihkar, ja bargá journalistan ja girječállin. Son lea earet eará čállán girjji Joik i den gamle samiske religionen.

 

KONFERÁNSA

Arctic Frontiers lágiduvvo ođđajagemánu 21.-26. b. Tromssas.

Davviguovlluid konferánssa ulbmil lea čohkket árktalaš guovlluid njunnošiid ja ovddidit buoret ovttasbarggu guovllus. 

2018 Arctic Frontiers vihtta ulbmila leat Árktisa stáhtus, Teknologiija ja oktavuođat, Ealás árktalaš servodagat ja fitnodatovdáneapmi, Dearvvaš ja buvttadeaddji áhpeguovllut, Industriija ja biras.

Ministarat ja dutkit digaštallet váldoulbmiliid. Konferánsii ii beasa gii beare, muhto das lea mearkkašupmi davviguovlluid álgoálbmogiid boahtteáigái, daningo lea sáhka davviguovlluid luondduvalljodagain.

 

JUOVLABEAVDI

SSDN lágidit juovlafeastta ođđajagemánu 19. b.!

Davvi-Norgga Sámi studeantasearvi bovde juovlabeavdái 19.01. dii 20:00!

Mii sávvat bures boahtima (veahá maŋŋonan) juovlabeavdái Romssas ođđajagimánu 19. b.! Juovlabeavdi lea TUIL-Arenas Tromsdalenis. Skábma nohká ja dan mii ávvudit feasttain, mii bistá dassá beaivváš badjána! Mii lohpidit njálgga juovlabiepmu ja Rolf A&B Gjengen čuojaha musihka nu ahte beasat dánset nu ahte vuoddagat nullosit ja riskkut širaidit! Juhkosa válddát ieš mielde.

Coggal gávtti dahje eará čiŋaid ja álggat jagi sámi somámus juovlabevddiin!

 

FILBMAFESTIVAL

TIFF 2018 ođđajagemánu 15.-21. b. Tromssas

Tromssa riikkaidgaskasaš filbmafestivála lágiduvvo 28. háve ođđajagemánu 15.-21. b. 2018.

TIFF lea sihke bivnnut gehččiid gaskkas, ja seammás sihke Norgga ja riikkaidgaskasaš filbmasuorggi mávssolaš deaivvadansadji.

Beasat oaidnit oanehis filmmaid, dokumentáraid ja sierralágan filmmaid, maid dovddus ja dovdameahttun sámi filbmadahkkit leat ráhkadan.