Preassagovat

Mii – Gos – Goas? 08.06-15.06

SÁMi ođasmagasiidna muitala juohke háve juoidá, mii ovddos guvlui dáhpáhuvvá Sámis! Bures boahtin min “Mii – Gos – Goas?” spáltii!

KURSSAT

08.06 Gelddolaš vahkkoloahppa Suolovuomis - iežas ovdánahttin ja dikšun.

Geassemánu 8-10. b sáhtát searvat ovttastuvvon kursa- ja vásáhusvahkkolohppii. Beasat vásihit goruda, sielu ja miela dikšuma.

Kursa addá dutnje vejolašvuođa hukset ja nannet iežat, ja ovddidit nannoset veršuvnna alddát, sihke mentálalaččat ja rumašlaččat. Oaččut buoret áddejumi alddát, luonddu ja buot eará du birra iežat birrasis.

Dáidda doaimmaide sáhtát oassálastit:

1. Dálkkasšattut ja daid historjá

2. Iešdikšun - liikedikšun

3. Galledit skearrostudio Mázes

FESTIVÁLA

Røros Folk Festival 2018

7-10.06 Sáhtát oastit eahketbileahta sihke bearjadahkii ja lávvardahkii! Sis leat maiddái moadde festiválapássa báhccán.

Bearjadaga eahketbileahtain beasat vásihit:
- Sastrugi – Dán jahkái diŋgojuvvon bihtá Erlend Vikenis.
- Sudan Dudan-konseartta
- Festiválapuba gos Copper City Ramblers čuojaha. 

Lávvardaga eahketbileahtta:
- Triakel konsearta
- Øystein Sunde & SVER -joavkku konsearta.

«Sommerlyst» -nuoraidfestivála Tromssas

08.06 dii 18:00 rájes sáhtát gullat earet eará SlinCraze, ISÁK ja Green Lake. Artistalistu ođasmahtto dađis. Festiválii beassá nuvttá ja nuoraide guossohit buori borramuša, besset geahččaladdat eksohtalaš biepmuid miehtá máilmmi. Nuorat besset maiddái oassálastit dahje geahččat V3V-gorespábbagilvvuid.

Festivála lágidit ovttas Tromssa gielda, Kirkens bymisjon,  

Den Kulturelle Skolesekken, TRAPP, Erling Solvang, Audiator ja Erik Junge Eliasen.

Álbmotfeasta Riehpovuonas!

15-16.06 gitta dii.23:00 rádjai.

Natur og Ungdom sávvá bures boahtin Riehpovuona ja báikkálašservvodaga álbmotfestii Fálesnuori suohkanii, Finnmárkui! 

Searvva ávvudit boazodoalu, mearrasámekultuvrra ja dasa lassin guovllu divrras luondduárbbi.

Álbmotfeasta lágiduvvo festivála hámis, mas lea máŋggakultuvrralaš lávdečájáhus, ee. loaiddastit ISÁK, Resirkulert, Eirik Lyng ja OZAS ovttas Sara Marielle Gaupain ja Risten Anine Gaupain. Dasa lassin lágiduvvo slampoesiija bargobádji, mearrasámi dáiddačájáhus ja suffáságastallamat Nussir ASA ruvkeášši vuosttildeddjiiguin. Dasa lassin guossohuvvo borramuš ovttasbarggus boazodolliiguin ja guolásteddjiiguin!

Doaluid ulbmiliin lea ráhkadit deaivvadanbáikki iešguđet kultuvrraide ja iešguđet oaiviliidda mat leat čatnot Riehpovuona ealáhusaide. Doaluide bovdejit erenoamážit nuoraid, sihke báikki ja eará guovlluid nuoraid, mávssolaš ja movttiidahtti vahkkolohppii.

ALKOHOLAHIS DOALUT!

Buohkat leat bures boahtin! Jos leat Natur og Ungdom -searvvi miellahttu, de searvi lágida dutnje idjadeami ja boradeami. Dalle fertet dieđihit iežat deike.

ČOAHKKIMAT

12-15.06 dii. 09:00-14:30 Sámedikki dievasčoahkkin

Dievasčoahkkin sáddejuvvo neahtas njuolga.

Prográmma ja áššebáhpáriid gávnnat dás.

GIELLA

12.06 dii.17-18:30 Boađe duhkoraddat. Duhkoraddanboddu Porsáŋggu Sámi giella- ja kulturguovddážis.

15.06 dii. 11:30-13:00 Oahpa vihtta sáni boradettiin.

Váldde mielde beaiveborramuša, ja boađe boradit ja oahppat giela Porsáŋggu sámi giella- ja kulturguovddážii.

 

Emneord: