Mii ánssášit albma buori Sámi dearvvašvuođafálaldaga

Ođđa Sámi klinihkka gárvvásmuvvá čakčii. 87 miljovnna ruvnno visttis galget čavčča rájes fállat sámiide somáhtalaš bálvalusaid, psyhkalaš dearvvašvuođasuddjema, veahki darvánanváttisvuođaide ja dulkonbálvalusa. Vaikko lea máilmmi buorre ahte Sámi klinihkka ásahuvvo, de ii leat dattetge sáhka earás go ahte čohkkejit dálá fálaldagaid ovtta robi ja vuollái, go dát bálvalusat fállojuvvojit jo dál.

Sámi doavttersearvi lea duhtavaš ja lohká dán buorrin álgun. Sii oaivvildit ahte klinihka sisdoalu ferte nannet ja viiddidit. Áidna vuohki dan dahkat lea lasihit virggiid dohko. Nedrejord ii loga klinihkkii dál ásahit áktánasat ođđa doavttervirggiid, muhto ahte Finnmárkku buohccivissui baicce lasihit virggiid. Dát doaktárat barget de dihto beivviid Kárášjogas. Nedrejord ballá ahte klinihkkii bohtet de dárogielhálli doaktárat, go čájehuvvo ahte sámi doaktárat eai biso Hámmárfeasttas heajos orrunvejolašvuođaid geažil.  

Sámi klinihkas galgá maid leat riikkaviidosaš ovddasvástádus sámi pasieanttain. Danne imaštit ge Sámi doavttersearvvis go klinihkka ásahuvvo Finnmárkku buohcciviessu vuollásažžan. Eanemus govttolažžan livččii sámi klinihka ásahit njuolgga departemeantta vuollái.

SÁMi ođasmagasiidna lea movtta go Sámi klinihkka ásahuvvo. Lea dehálaš čohkket sámi dearvvašvuođa bálvalusaid ovtta robi vuollái. Sámi divššohasat ánssášit dan. Sámi divššohasat maid ánssášit beassat sámegielat doaktáriin háleštit ja ánssášit oažžut eanaš dearvvašvuođa bálvalusaid Sámi klinihkas. Danne leat ilus go mis leat nana čeahpes olbmot nugo Sámi doavttersearvvi jođiheaddji Máret Lájla Nedrejord. Sii gozihit ja barget dan nammii ahte midjiide fállojuvvo buot buoremus.

Mii sávvat maid nugo son, ahte dát lea dušše álgu ja ahte Kárášjohkii ásahuvvojit eambbo fálaldagat ja dieđusge eambbo virggitge. Sávvat gal maid ahte boahtteáiggis Sámi klinihkka mas lea bajimus ovddasvástádus sámi divššohasain, boahtteáiggis ii leat guovllu buohcciviesuid ossodahkan, muhto šaddá baicce áibbas sierra dearvvašvuođaásahussan, mii vástida njuolgga departementii. Dan gal oainnát ánssáša sámi pasieanta, sámi doavttir ja Sápmi.

Emneord: