Mii ánssášat eambbo

Dán SÁMi ođasmagasiinnas mii leat jearahallan uhca oasáža daid sámepolitihkkáriin, geat áiggi čađa leat hábmen sámepolitihka ja jearrat maid dán áigge hommájit. Oktiibuot leat birrasiid 300:s 30 bellodagas politihkken Sámedikkis. Boahtte jagi ávvuda Sámediggi 30 jagi.

Sii leat ásahan Sámedikki, sii leat huksen vuogádaga, mii nanne ja ovddida earet eará sámevuođa, kultuvrra, oahpahusa, giela ja ealáhusa. Sii leat áiggiid čađa rahčan min vuoigatvuođaid ovddas ja váikkuhan earet eará Finnmárkkulága ásaheami ovdii.

Ovdal Finnmárkkulága, maid FeFo dán áigge hálddaša, de lei Statskog gii hálddašii Finnmárkku eatnamiid. Finnmárkkuláhka lei oalle vuoitun Sápmái, go dasto álggii duohta bargu čielggadit sámi vuoigatvuođaid Finnmárkkus.

Movt boahtteáiggis šattaš, ii leat buorre diehtit. Dán magasiinnas, mas joatkašuvvá min ráidduin Tromssa ja Finnmárkku ovttastahttima birra. Stuorradiggi lea mearridan ovttastahttit guokte davimus fylkka, ja de lea jearaldat movt ovdamearkka dihte Finnmárkkulágain dahket. Ráđđehusas ja Stuorradikkis lea dáhttu doalahit Finnmárkkulága ja dat han lea buorre.

Liikká lea báhcán vel stuora bargu. Tromssas leat maid guorahallame sámi vuoigatvuođaid, muhto dássážii ii leat makkárge láhka vel ásahuvvon. Ovttastahttima boađusin soaitá gártat nu ahte Finnmárkkuláhka viiddiduvvo nu ahte gusto Tromsii maid, jus fal “dološ” Tromsa ii oaččo sierra ja sullasaš lága. Muhto bargu ferte vuos gárvvistuvvot.

Nugo ovdalge leat čállán, de ii soaitte gal ovttastahttin vearrámus mii dahkko, muhto go dássážii ii oro mihkkige čielggaduvvon guđege guvlui, de berre Ráđđehus guldalit Finnmárkku fylkkagieldda, Sámedikki ja Finnmárkku álbmoga ja hilgut mearrádusa, čađahit váikkuhusguorahallama ja gulahallat albma láhkai Finnmárkku ja Tromssa fylkkagielddain, Sámedikkiin ja álbmogiin, ovdalgo maidege eará dahket. Mii dáhttut eambbo dieđuid stuora regiovnna birra, go mii han ássat ja eallit dáppe. Mii dáhttut diehtit mii boahtá buorrin ja mii hedjona.

Dramatihka geažil livččii gal hui miellagiddevaš čuovvut dikki, mas Finnmárku stevdne stáda, muhto jus stáda baicce jierpmálaččat jurddaša, de seastá dán dramatihka ja guldala baicce álbmoga. Dan ánssášit maiddái Finnmárkku politihkkárat ja dat badjel 300 sámediggepolitihkkára, geat leat rahčan min vuoigatvuođaid ovddas áiggiid čađa.

Emneord: