Máilmmi vuosttaš sámegielat dohkát bivnnuhat

Juo Sámi giellakonferánssas Tromssas šurre olbmot mii dán jagi bivnnuheamos juovlaskeaŋkan šaddá. Sámegielat dohkká, mii hállá sihke davvi-, julev- ja máttasámegillii. Sámediggepresideanta Aili Keskitalo ja sámediggeráđi Mikkel Eskil Mikkelsen leigga nu duhtavačča go viimmat sámástit dohkátge.


– Deaddil julggiid, gieđaid ja oaivvi, ja guldal maid dohkát lohket, lohká 
sámediggebargi Inga Anne Karen Sara SÁMi ođasmagasiidnii.

“A, čáh-čáh-cii, a čáh-čáh-cii, čáh-či, čáh-ci”, lávlu vávvá. Sámediggebargi Inga Anne Karen Sara dat čájeha SÁMi ođasmagasiidnii máilmmi vuosttaš sámegielat dohkáid, mat galget ávkin mánáide, stohkosa bokte nannet ja oahpahit sámegiela.

– Deaddil julggiid, gieđaid ja oaivvi, ja guldal maid dohkát lohket. Dát leat hui somás dohkát ja viim-mat dohkátge sámástit. Máhttet alfabehta, loguid, hoahkamiid ja lávlut. Dohkát máhttet lulli-, julev- ja davvisámegiela. Dat leat mánáidgárdemánáid várás ja sidjiide geat leat áiddo álgán skuvlii, lohká  Sámediggebargi Inga Anne Karen Sara, gii ii oba eahpitge ahte dát dohkát šaddet dán jagi bivnnuheamos juovlaskeaŋkan.

Almmuhuvvo giellakonferánssas

Sámi giellakonferánssas Romssas dat čájehuvvojedje dohkát vuosttaš háve almmolaččat. Ulbmil dohkáin lea ovddidit ja stimuleret máná giela stoahkama bokte. Dohkká sáhttá earet eará ovddidit gielalaš diđolašvuođa ja nannet doaba- ja giellaovddideami, čilge prošeaktajoavku, gii lea hutkan vávvá. Sámi earenomášpedagogalaš doarjja, SEAD, mii lea oassin Davvi Statpedas, lea hábmen dohká. Sámediggi lea ruhtadan prošeavtta ja sámediggepresideanta lei hui movtta go oinnii dohká vuosttaš geardde giellakonferánssas.

– Sámediggi lea rámis ja hui duhtavaš, logaiga sihke sámediggepresideanta Aili Keskitalo ja sámediggeráđi Mikkel Eskil Mikkelsen.


Rukses dohkká sámásta davvisámegillii, ruoná dohkká julevsámegillii ja alit dohkká ges lullisámegillii. Dat máhttet alfabehta, loguid, hoahkamiid ja lávlut.

Prošeaktajoavkkus leat leamaš Kirsten Wirkola, Solvår Knutsen Turi, Aasta Joma Granefjell, Tor Persen, Miriam Länta ja Tim Valio. Dohkáide leat luoikan jienaset Ajno-Sööfe Kuhmunen, Katarina Rimpi ja Aasta Joma Granefjell (lullisámegiella), Katarina Rimpi (julevsámegiella) Inga Marja Sarre ja GLR (davvisámegiella).