Loahpahedje sámi vahku heargesprinttain guovdu gávpoga

Romssa sámi vahku loahpahedje guovdu gávpoga NM heargevuodjingilvvuin. Falimus heargi lei Selfie, man Nils Kai Ante Anti vujii. Eaiggát Biret Julianne Hætta illudii golli ovddas.

GOVAT: Midnigstsun Marathon preassagovat, Zoltan Tot

Norggameašttirgilvvut heargesprinttas lágiduvvojedje Storgatas juo 15. geardde. Sprintabána lea 201,16 mehter guhko ja máilmmiolahusa bijai Anders Nils Eira 2005:s áiggiin 14,936. 

Dán jagi vuittii Selfie, man eaiggáduššá Biret Julianne Hættain. Gilvvuin vujii Nils Kai Ante Anti. Nubbin šattai King Klæbo, man eaiggát Johannes lea H. Klæbo ja Mikkel Andreas Eira, vuoddji John Inge Eira. Goalmmádin ges lei Oreo, man eaiggát lea Nils Jøran Eira, ja vuoddji John Inge Eira.

Árktalaš márkanat ja NM njoarostangilvvut ge ledje prográmmas. Gilvvut geasuhit sihke báikkálaččaid ja turisttaid. Njoarostangilvvuid dievdduidjoavkku vuittii Mikkel Mathis Hætta, Team Nils Jøran -joavkkus. Maja Sarre, Deanu searain vuittii ges nissonjoavkkus.