Lihkku vuoittuin Ella Marie!

Odne vuittii Ella Marie Hætta Isaksen Stjernekamp nammasaš NRK gilvvuid. Sámi Ođasmagasiidna sávvá lihkku dehálaš vuoittuin.

Sámi stuorimus násti Mari Boine duođaid čevllohallá Ella Marien. Soai leaba lávlun fárrolágaid ja Ella Marie lea duođaid guoskkahan Mari váimmu. Son čállá ná Facebookas:

– Lihkku vuoittun, Ellažan! Gratulerer, kjære Ella. Don leat jo áigá čájehan du boahtteáigi lea lávddi alde čeahpemusaid searvvis. Otne nannejuvvui dat buohkaid ovddas, čállá son Ella Marie siidui. 

Guovdageainnu sátnejođiheaddji Johan Vasara duođaid čevllohallá Ella Marie Hætta Isaksenin.

– Lihkkusávaldagat mis Guovdageainnus ja olles Sámis - don loktet min buohkaid, cealká Vasara Facebook siiddustis.

Logi vahku lea guovdageainnulaš/deatnulaš Ella Marie Hætta Isaksen (20) gilvalan NRK Stjernekamp nammasaš gilvvuin. Odne deaivvadii son loahppagilvvuin Ulrikke Brandstorpain. ja vuittii gilvvuid.

Olles Sápmi ja Norga ganjaldii

Ella Marie lea duođaid suddadan tv-gehččiid iežas jienain, ja geahččit leat jienastan Ella Marie vuoitin. NRK Sámi direktevra Mona Solbakk lea erenoamáš rámis. NRK Sápmi dat lea oainnát dolvvodan su stuorát lávddiide. Sámi Ođasmagasiinna bokte cealká son váimmolaš dearvuođaid.

– Ráhkis Ella! Váimmolaš lihkku Stjernakamp vuoitin. Nu ánssášuvvon. Gal don leat erenoamáš čehpet hálddašan juohkelágan šaŋŋeriid. Muhto go Máze ja Ozan de rohttestit, de olles Sápmi ja Norga ganjaldii. Dán jagáš Stjernekamp ja du oasálastin lea nu erenoamáš stuorra mearkkašupmi sámi musihkkii, artisttaide ja sámevuhtii. Ellos Ella, luohti ja Sápmi!

Presideanta njuorrasii

Loahppagilvvuin ovdanbuvttii Ella Marie earet eará iežas šuoŋa ovttas iežas ISÁK joavkkuin ja Adjáagasa luođi “Ozan”. Loga reportáša Ella Marie birra. Mii finaimet oainnát su galledeame moadde vahku áigi. Sáhtat dás lohkat dan.

Facebook masá duldii maŋŋel go čielggai ahte Ella dat vuittii. Sámediggepresideanta Aili Keskitalo lei okta daid vuosttaš olbmuin gii sávai lihkku Ellai Facebookas. Son lea ganjalčalmmiin čuvvon sáddaga. Maiddái Sámi áššiid stádačálli Anne Karin Olli lea okta dain gii sávvá lihkku. 

VG árvvoštallit eai oba dieđe ge movt galget rápmut Ella. Sii gohčodit su stuora nástin. Geahča dá maid čállet:

Sámediggeráđi Henrik Olsen lei geahččin Stjerekamppas. Dál sávvá Sámediggi iežas almmolaš Facebook siiddus lihkkusávaldagaid.