Kárášjohkalaš Karina Heim (17) lea vuoitán Putsj-bálkkašumi govainis «Vannmangel – vår tids Hunger Game». Govven: Therese Knutsen

Kárášjoga nieida vuittii Putsj-bálkkašumi

Kárášjohkalaš Karina Heim (17) lea vuoitán Putsj-bálkkašumi govainis «Čáhceváili – min áiggi Hunger Games” (Vannmangel – vår tids Hunger Games), 13-18 jahkásaččaid luohkás.

Čakčat bovdii Putsj, ovttasbarggus Skuvlajođiheaddjelihtuin, govvagilvui man fáddán lei dálkkádatrievdadusat. Gilvvu ulbmilin lei čalmmustahttit juoidá, masa dálkkádatrievdadeapmi váikkuha. Čielga govvideami lassin árvvoštallojedje sáddejuvvon barggut maiddái dan vuođul man bures dat nagodedje čilget oktavuođa motiivva ja dálkkádatrievdadeami gaskka. Hutkáivuođas ožžo liigečuoggáid. Gilvvus ledje guokte ahkeluohká: 13-18 jahkásaččat ja 18-25 jahkásaččat.

Dieđut

Putsj-bálkkašupmi ásahuvvui 2014 maŋŋel go Skuvlajođiheaddjelihttu bijai barggu johtui. Ruđaid váldet lihtu birasfoanddas.

Jury lahtuid nammadit Natur og Ungdom, Putsj ja Skuvlajođiheaddjelihttu.

Ulbmiliin lea gilvit gelbbolašvuođa ja beroštumi birasgažaldagaide nuoraid gaskkas.

PUTSJ lea nuoraid magasiidna, man fáddán lea biras, kultuvra ja aktivisma. Dan almmustahttá Natur og Undom.

AIDDO ÁLGÁN

Karina Heim ii loga diehtán nu ollu gilvvu birra ovddalgihtii, ovdal Natur og Ungdom (NU), mas ieš lea miellahttun, ávžžuhii oassálastit gilvui.

– Mus lea hui buorre skibir, gii lea fylkkajođiheaddjin NU-organisašuvnnas ja son dat logai ahte berren almmuhit iežan gilvui. Govvidemiin álgen sullii jahkebeali áigi ja vuoitogovva lea okta vuosttaš govain maid lean govvenrusttegiin váldán, muitala son.

Vuoitogova lei son váldán ovddalgihtii ja heivehii teavstta dasa ovdal go sáddii gilvui. Nuorra kárášjohkalaš lohká iežas maiddái garra luondduberošteaddjin ja danin háliidii maiddái searvat gilvui.

LIHKKOGATNJALAT

Son ii livčče goassige jáhkkán ahte vuoitá gilvvu, mas oaččui bálkkašumi ja 5000 kruvnnu. Karina Heim ii loga diehtit gallis ledje oasálastán gilvui, iige dat boađe ovdan gilvvu ruovttusiiddus.

– Mun ja mu skibir ribaheimme ganjaldišgoahtit dáppe skuvllas, go oaččuime gullat ahte lean vuoitán. Nu ahte gal dat jo muitala man ollu dat mearkkašii munnje, go lihkkogatnjaliid sihkkon muođuin. Mus lea álo leamaš miella geavahit iežan hutkáivuođa, ja dát bálkkašupmi duođašta ahte mun máhtán ja sáhtán joatkit govvidemiin, muitala movttegis kárášjotnieida.

(Ášši joatkašuvvá gova vuolde)


VUOITOGOVVA: Karina Heim lea govven «Vannmangel – vår tids Hunger Game» vuoitogova Tverrelvas Álttás iežas skuvlabarggu oktavuođas. – Mun háliidin ráhkadit ráfálašvuođa dovddu govain, dadjá son.

HÁLIIDA JOATKIT

Heim vázzá skuvlla Álttás ja áigu šaddat šibitdoavttirin boahtteáiggis. Son liiko maid govvidit ja háliida dainna joatkit maiddái boahtteáiggis.

– Mun válljejin govvafága, go háliidin juoga mii lea lahka mu beroštumiid. Lean maiddái ráhkadan iežan instagram-siiddu masa bijan iežan govaid. Vuoitu movttiidahttá mu joatkit govvidemiin ja lea maiddái mu liigeplána eallimis, jus in lihkostuva šibitdoavtteroahpuin.

Maid du bearaš ja lagamusat jurddašallet bálkkašumi birra?

– Sii lohket buohkat leat nu rámis ja hui ilus go lihkostuvan, loahpaha son.

Jury árvvoštallan:

Issoras buorre govva, mii fáhte aktivitehta ja lihkastemiid čáhcerávnnjis, ja oažžu juoga mii lea áibbas dábálaš ja árgabeaivválaš, oidnot hui gelddolažžan ja dramáhtalažžan. Govvejeaddji čájeha maiddái buori áddejumi dálkkádatrievdadeami ja čázádaga oktavuođas, ja nagoda oaidnit makkár oktavuohta min birasváikkuhusain lea máilmmiviidosaš váttisvuođaiguin.

Loga eanet Putsj-bálkkašumi eará vuttiid birra dás:

Emneord: