– Lea oalle roavis ja suorggahahtti go stáda ii oro vuhtiiváldime ON. Nu lohká Sámediggeráđi Silje Muotka.

– Jus stáhta ii doahttal ON, de olles Sámi servodagas leat hástalusat

Sihke Jovsset Ánte Sara áššis ja bieggamillopárkka áššis Åarjel Fovsen Sijtes lea Ráđđehus geažuhan ahte ON:s ii leat mearridanváldi Norggas.  – Jus Norgga stáhta ii beroš ON ávžžuhusaid čuovvulit, de mis buohkain leat hástalusat.

Nu lohká Sámediggeráđi Silje Muotka, geas lea ovddasvástádus boazodoalloáššiin.

Medias, miehtá Norgga ja maiddái olgoriikkas, leat beakkehan boazodoalloáššit, maid Norgga Ráđđehus ii dáhto čoavdit boazodolliid premissaid vuođul. Mannan vahkus biehttalii Stuorradiggi vuordimis bággodoaimmain Jovsset Ánte Sara áššis, dassái go ON olmmošvuoigatvuođakomitea lea cealkán áššis. Seamma vahku dieđihii Ráđđehusa advokáhta ahte stáhta ii dárbbaš bissehit bieggamillopárkka huksema Åarjel Fovsen Sijte guohtoneatnamiin, vaikko ON gohčču vuordit dassái go guoddaleapmi lea meannuduvvon.

Lea oalle roavis ja suorggahahtti go stáda ii oro vuhtiiváldime ON. ON han lea riikkaidgaskasaš orgána, mii galgá bearráigeahččat ahte riikkat dahket riekta álbmoga ektui. Mun in dieđe movt mii galgat dán dustet, muhto mii fertet dieđusge čuovvulit dan. Maŋŋebárgga lea mis ráđđečoahkkin, muhto dieđusge jus stáhta ii beroš ON ávžžuhusain, de mis buohkain leat hástalusat, lohká Muotka.

 Eai guldal ON, Sámedikki eaige NBR

Sámediggeráđis barget olu váttes boazodoalloáššiiguin systemáhtalaččat.

– Vaikko mediat dál leat čálašan dáid áššiin, de mii leat diehtán dáid áššiid birra juo guhká ja mis lea leamaš konsultašuvdna ođđa eanandoalloministariin ja leat hástalan su geahčadit boazodoallolága. Lága dat ferte rievdadit, muđui lea veadjemeahttun dilli. Dát láhka lea guston logi jagi, ja stáhta lea dušše rievdadan eaŋkil páragráfaid movt sidjiide lea heiven buoremusat.  Stáhta leat biehttalan čuovvoleames Sámedikki ja NBR ávžžuhusaid, lohká Muotka.

Muotka kritisere golbma maŋimuš eanandoalloministara.

­– Go Sylvi Listhaug lei eanandoalloministtar ja finai dáppe davvin, de buohtastahtii misiid bussáčivggaiguin, ja logai ahte bággonjuovvamiid ferte čađahit. De bođii Jon Georg Dale ges, ja son sivahalai Sámedikki billistit geahpedeami go doarjut sin, geat eai leat čuovvulan eiseválddiid. Dál mis lea fas ođđa ministtar, Bård Hoksrud, ja sus orrot leamen seammalágan oainnut, lohká Muotka gii sávvá ođđa láhkalávdegotti, man Sámediggi lea ásahan, nagodit ovddidit láhkarievdadeami.

Dárbu veahkehit

Golbma jagi lea Sámedikkis leamaš riekteveahkedoarjjafoanda. Diimmá bušeahtas bidje dasa miljovnna ruvnno. Dál lea Sámediggi ferten lasihit fondii vel miljovdnabeali.

– Dát ortnet bođii maŋŋel go friddja riekteveahkkekantuvrraid heaittihedje stáda beales. Heaittiheapmi lei šállošahtti, muhto in dieđe man olu riekteveahkkekantuvra lei sáhttit veahkehit go leat boasttuvuođat lágas. Sámediggi oažžu golmma geardde eambbo ohcamiid, go masa Sámedikkis lea ruhta. Dat čájeha ahte lea dárbu dákkár fondii ja ahte lea maid dárbu ahte Sámediggi bargá boazodoaluin, čilge son

Dássážii ii leat Sámedikkis leamaš gievrras rolla boazodoalus ja Muotka lohká dan šállošahttin.

­– Mun dieđán ahte NBR:s leamaš siskkáldasat olu eahpesihkkarvuohta Sámedikki rolla ektui, muhto mun oainnán ahte leat eanet ja eanet vuordámušat Sámediggái boazodoalu áššiid ektui, ja dat lea hui buorre, go dat čájeha ahte olbmot oidnet Sámedikkis ávkki, lohká Muotka.

Duorastaga Silje Muotka deaivvada ges Peder Sokkiin, gean birra SÁMi ođasmagasiidna čállá.

­– Leat olu diggeáššit jođus dál, ja Peder Sokki ii leat áidna ášši, mii jorrá dikkis. Duorastaga čoahkkinasttán Sokkiin, inge sáhte su ášši kommenteret vuos ovdal go gulan Sokki dárbbuid, lohká son.