SÁMi ođasmagasiinna váldodoaimmaheaddji Anne Rasmus ja beaivválaš jođiheaddji Jan Skoglund Paltto leaba hirbmat duhtavaččat go Sámediggi juolludii 155 000 ruvnnu ovddidit máttasámegiel digitála fálaldaga ođasmagasiinnas. – Dál mii joatkit máttasámegielat mediafálaldaga ovddidemiin, dadjá Rasmus.

Illudeaba go máttasámegiella vuoruhuvvo

Sámediggi juolludii 155 000 ruvnnu SÁMi ođasmagasiidnii ovdánahttit ja nannet digitála máttasámegielat mediafálaldaga. – Illusáhka máttasámegielagiidda, go dál ožžot nuvttá digitála mediafálaldaga iežaset eatnigillii.

Nu lohká SÁMi ođasmagasiidna váldodoaimmaheaddji Anne Rasmus. Son lea badjelaš jagi bargan oččodit buori fálaldaga maiddái máttasámegielagiidda. Illusáhka joavddai doaimmahussii mannan gaskavahku veaigin.

– Mis leat leamaš ollu hástalusat máttasámegiel áššiid buvttademiin, muhto mii leat daid ferten beare čoavdit dađis. Dat ahte Sámediggi dál lea válljen juolludit min prošektii ruđa, álkidahttá min barggu ja lea stuorra illusáhka máttasámegielagiidda, geat dál ožžot nuvttá mediafálaldaga iežaset eatnigillii. Dat mearkkaša ahte buot máttasámegiel áššit biddjojit min neahttasiidui nuvttá ja rabas buohkaide geat háliidit lohkat dahje geahččat filmmažiid, illuda Rasmus, gii dál sávvá gávdnat máttasámegielat bargi prošektii.

Joatká bargguin

Dálá dilis SÁMi ođasmagasiidna almmustuvvá sihke davvi- ja máttasámegillii. Maiddái dárogillii almmuha ođasmagasiidna muhtin áššiid, dávjá daid mat leat jorgaluvvon máttasámegillii. Doarjagiin magasiidna beassá joatkit digitála prošeavttain, mainna beassážiid áigge álggii, namalassii buvttadit sihke artihkkaliid ja videoáššiid máttasámegillii nehttii.

– Mii fertiimet álgit ovtta sajis, vaikko mis ledje unnán návccat, muhto lean hui ilus ahte Sámediggi dál lea oaidnán ahte mii váldit prošeavtta hui duođalaččat. Go duohtavuohta lea nu ahte eai buohkat máhte lohkat máttasámegiela go dáruiduhttin ain vuhtto ja danin eat olahan nu viidát čálalaš áššiiguin. Dan seamma oaivvildii Sámediggi ja leage eaktudan juolludeami digitála áššiid ja videoáššiid buvttadeapmái, mii lea mielde čalmmustahttimin ja ovdánahttimin áitojuvvon giela, lohká Rasmus.

– Ligge mu giellaváimmu

SÁMi ođasmagasiinna beaivválaš jođiheaddji Jan Skoglund Paltto, gii álo lea bargan giellaáššiiguin, lei erenoamáš movtta.

– Dát mearkkaša olu midjiide ja mearkkaša erenoamáš olu máttasámiide. Go Sámediggi juolluda ruđa, de čájeha ahte leat váldán min giellabarggu duođas. Dál beassat joatkit ja nannet vel barggu man leat álggahan beannot jagi áigi, lohká Skoglund Paltto.

Ášši joatkašuvvá gova vuolde.


Sámediggepresideanta Aili Keskitalo. Govven: Sara Beate Eira Persson/Sámediggi

– Mearkkaša olu lullisámi nuoraide

Sámediggepresideanta Aili Keskitalo oaidná dehálažžan ahte maiddái máttasámegielagiidda leat buori mediafálaldagat.

– Leat unnán lullisámegielat mediafálaldagat, ja hui dehálaš ahte lullisámi nuorat besset lohkat áigeguovdilis áššiid birra dahje gullat daid birra iežaset gillii. Lea maid dehálaš ahte gávdnojit mediafálaldagat, mat čatnet Sámi oktii, lohká Sámediggepresideanta Aili Keskitalo.