Historjjálaš duopmu celkon gearretrievttis

Gearretriekti ii dubmen Kati Eriksena, Heidi Eriksena ja sudno bivdoskihpáriid, ahte livčče lobiheamet bivdán Veahčajoga mannan gease. Ii leat imaš go bivdojoavku lea nu duhtavaš. Sii leat oainnát historjjálaš vuoittu viežžan ruoktut. 

Buot vulggii das go Kati ja Heidi ja moattis vel ledje dolkan ánuheames lobi beassat bivdit ruovttobáikkiset jogas. Sii ledje dolkan gilvaleames turisttaiguin ja earrásiin jearrat bivdoeriid. Sin mielas orui veadjemeahttun giđđat juo diehtit justa guđe beaivvi ja galle áigge sii mánáiguin vuolggášedje oakkastit. Nu sii plánegohte áibbas erenoamáš dagu, man almmuhedje sihke ovdal ja velá bivddu maŋŋá. Sii iešdáhtos rihkko Suoma guolástanlága.

Joavku manai Veahčajoga bivdit ja váide iežaset virggálaš meahccevávttaide, geat leat geatnegahtton dieđihit láhkarihkkumiid bolesiidda. Ášši gárttai diggái ja dál lea gearretriekti cealkán ahte sin bivdu ii lean lobiheapme, go sii leat dološ áiggi rájes bivdán ja go dat lea sin kultuvra. Duopmár njulgestaga čujuhii dasa ahte vuođđoláhka suodjala sámiid vuoigatvuođaid.

Vaikko duopmu váikkuha ovddemustá dán bivdojovkui, de sáhttá dat mearkkašit olu buot sámiide, jus fal Alimusriekti doarju gearretrievtti. Stáhta oainnat guoddala ášši. Das ii leat olus dramatihkka, danne go bealit ledje soahpan guoddaleami hárrái ovdal dikki jo. Bivdojoavku háliida ášši meannuduvvot Alimusrievttis, danne go ášši lea stuorát go dušše dan maid ieža dahke. Ášši váikkuha oainnát guolástanláhkii, mii vuolggahii ge olles ášši.

Aiddo maŋŋelaš duomu de Suoma riikkabeaivvit rievdadedje guolástanlága. Kati ja Heidi leigga sávvan ahte sámit namuhuvvošedje lágas. Dan eai daga, vaikko láhka lea veahá buoret go ovdal dál. Boahtte gease rájes besset olbmot, geat ásset Anáris, Ohcejogas ja Eanodagas, guolástit govttolaš haddái ja vuollái 18-jahkásaš mánát ja nuorat besset nuvttá bivdit.

Jurista Laila Susanne Vars láhkai mii maid vuordit, ahte láhka rievdaduvvo jus fal Alimusriekti čuovvula gearretrievtti duomu. Mii vuordit maid ahte bivdojoavku ja sámi vuoigatvuođat gudnejahttojuvvot Alimusrievttis. Jus nu geavvá, de dat sáhttá eará riikka sámiide maid váikkuhit. 

 

 

Emneord: