Sámediggepresideanta Aili Keskitalo. Govven Kenneth Hætta

Hásttuha buohkaid searvat giellaloktemii!

Son dáhtušii eambbo sámegiela oaidnit ja lohká eamiálbmogiid giellajagi leat buorre álgun oainnisin dahkagoahtit sámegiela juohke arenas.

– Danne áigut bovdet ja ávžžuhit ealáhusaid, ásahusaid, organisašuvnnaid, priváhta ja álmmolaš aktevrraid ja du searvat giellaloktemii. Mii háliidit ahte juohke okta galgá váldit ovddasvástádusa báikkálaččat, regiovnnalaččat dahje nationálalaččat, dadjá sámediggepresideanta Aili Keskitalo.  

Sámediggi lohká Min boazu – aiddo álggahuvvon boazonjuovvanfitnodat, lea ovdamearkan dasa mo sámegiela sáhttá oainnusmahttit. Fitnodat geavaha sámegiela buot iežas buktagiin, logos, almmuhusain ja diehtojuohkimis sosiálalaš mediain ja oktavuođas boazoeaiggádiiguin. 

– Mii háliidit eanet dákkár doaimmaid, ja mii háliidit ahte galgá leat lunddolaš oaidnit sámegiela ja dárogiela bálddalagaid, leaš dal borramušgálvvuin, almmuhusain dahje sosiálalaš mediain.